Ruth i Esther

Lesa pa e Estudio di e Siman Akí:

Versíkulo di Memoria:

“Asina a sosodé, ora rei a mira reina Esther pará den e patio, ku el a haña grasia den su bista, i rei a ekstendé na Esther e sèpter di oro ku e tabatin den su man. E ora ei Ester a hala serka i a mishi ku punta di e sèpter” (Esther 5:2, NKJV).

E siman akí nos ta sigui eksplorá storianan ku ta prefigurá susesonan di último dia. Dor di usa susesonan i hende di bida real, Dios ta yuda nos mira kosnan for di Su perspektiva i ta yuda nos komprondé kon interpretá e profesianan ku ta bini despues, ku ta ser duná pa yuda fortalesé nos fe.

Nos atenshon ta bira na dos muhé importante ku nan storianan a toka kurason di inkontabel generashon: Ruth i Esther. Un ta un biuda ekspropiá, ku ta haña speransa despues di a topa ku e bondadoso Boaz, su pariente redentor. Nan matrimonio a bira un storia di amor faborito pa kristiannan pa motibu di e manera ku e ta reflehá e amor di Kristu pa nos. E otro ta un mucha muhé yòn ku ta biba den un tera strañero, ku ta bira konsiente di un kòmplòt pa destruí su pueblo i ta haña su mes pushá riba e esenario prinsipal den e drama ku ta desaroyá pa salba nan.

Den profesia, naturalmente, un muhé ta un símbolo poderoso pa e iglesia di Dios, tirando hopi lus riba kon Dios ta konsiderá Su pueblo. Laga nos wak e relatonan bíbliko di e dos muhénan akí, ku nan sirkunstansianan di bida a ser inmortalisá den e Palabra di Dios, i trata na saka kualke lès ku nos por for di nan eksperensianan.

Hamber den “E Kas di Pan”

Krítikonan di e fe kristian hopi bes a mustra riba e realidat brutal di biba den e mundu akí komo evidensia ku:

1. Dios no ta eksistí,
2. E ta sin poder pa intervení ora kosnan malu pasa,
3. E no ta preokupá ora nos tin doló.

Hopi di e storianan di Beibel, sinembargo, ta proveé abundante evidensia ku ningun di e suposishonnan akí ta korekto. Bèrdat, Dios ta permití e rasa humano kosechá e konsekuensianan di rebelion kontra djE. Pero sin violá nos boluntat liber, E ta semper presente, semper ta obra den historia humano, semper ta move nos den direkshon di e resolushon final di e problemanan di piká i sufrimentu. E storia di Ruth ta duna un di e ehèmpelnan ei.

Lesa Ruth 1:1–5. Ki difikultatnan a kai riba Naomi i Ruth, i kiko a kousa nan? Kon esaki ta reflehá e situashon ku henter e rasa humano ta enfrentá awor?

Tin ironia pa haña den e deklarashon di apertura di e storia akí: tabatin un hamber ku a afektá Bethlehem, un stat ku su nòmber ta nifiká “kas di pan.” Ta rekordá hende di e abundansia di Eden, kaminda Dios a bisa Adam i Eva: “Di tur palu di e hòfi bo por kome libremente” (Gén. 2:16, NKJV). E rasa humano a kuminsá su eksistensia na abundansia, bou di kuido di un Kreador generoso, pero despues a interkambiá su ròl komo kuidadó di kreashon pa sklabitut di piká. “Ku sodó di bo frenta lo bo kome pan te ora bo bolbe na tera,” Dios a bisa Adam (Gén. 3:19, NKJV). Meskos ku Naomi, nos a ser desapropiá di e herensia ku Dios a plania originalmente pa nos haña, i nos bida a bira un difikultat. Eden a ser duná komo un regalo, pero no inkondishonalmente: hende tabata liber pa rebeldiá, pero esei lo a nifiká ku nan lo mester a tuma responsabilidat pa nan propio bienestar. Originalmente, nos tabata destiná pa “someté” henter e mundu no kaí bou di bendishon di Dios, pero awor nos ta konfrontá ku e tarea di someté un ku a kai. Sernan humano egoista ku ta kompetí pa rekursonan skars ta hiba na hopi doló di kurason i sufrimentu.

E tragedia ta indeskriptibel: ainda tera ta produsí abundantemente, un testimonio poderoso di e amor di Dios. Pero entre golosidat humano i e destrukshonnan di piká, e mundu tin bes ta parse di ta someté nos mas ku nos ta somet’e. Un dia, sinembargo, tur esaki lo kaba.

Asta despues di seis mil aña di piká i morto, kon tera ainda ta revelá e maravianan di e amor i poder kreativo di Dios?

Ruth i Boaz

Naomi a pidi pa su nòmber ser kambiá pa Mara pa motibu di e amargura ku a kai riba su bida (lesa Ruth 1:20). Nos relashon ku nos Kreador a ser dañá ireparablemente dor di piká, fòrsando nos den pobresa spiritual. Nos perspektivanan ta skur, i nos ta pasa nos bida ta piki loke nos por for di e rantnan di e kunuku, bibando riba e restunan di alegria ku ainda por ser hañá den un mundu kibrá. Pero tur kos ta kambia na momentu ku nos hasi un deskubrimentu remarkabel: Dios no a lubidá nos.

Lesa Ruth 2:5-20. Dikon esaki ta un momentu asina krusial den e storia? Dikon bo ta kere ku Naomi su deskubrimentu di e identidat di e benefaktor tabata asina bon notisia?

Naomi no por a tuma poseshon di e tereno di su kasá Elimelech sin optené yudansa di e famia di su esposo. E ta spera ku Ruth por kasa ku un pariente yegá di su esposo defuntu i haña un yu den nòmber di Elimelech. Dios a hasi provishon na Israel pa individuonan por reklamá nan herensia den e Tera Primintí: un pariente yegá tabata nesesario pa redimí e herensia di Elimelech. Boaz no tabata djis un kunukero bondadoso; e tabata un pariente di Elimelech ku por a redimí e tera.

E deskubrimentu ku Boaz no tabata solamente bon di kurason i generoso sino un pariente tabata e mihó notisia posibel: e pobresa den kua e dos muhénan akí tabata eksistí no mester a dura pa semper.

Kristiannan a komprondé pa hopi tempu kaba ku Boaz ta un tipo di Kristu, kende no ta solamente nos Kreador sino a skohe pa bira nos pariente, un ser humano di karni i sanger, real, un di e motibunan pakiko, bes tras bes, El a yama Su mes “e Yu di hende” (Mat. 12:8, Marko 8:31, Lukas 22:22, Juan 14).

Demasiado hende ta pensa di Dios den términonan severo, p.e.: “Kisas E lo laga nos drenta shelu si nos marka tur e hòkinan korekto den un kuestionario moral, ma E lo hasi esei di mala gana pasobra nos a logra sali padilanti riba un detaye tékniko.” E imágen di Kristu revelá den Boaz ta desplasá noshonnan asina kompletamente. Dios no solamente ta nota nos, sino, apesar di nos pobresa spiritual profundo, E ke nos komo Su brùit.

Boaz komo Redentor

Boaz ta namorá profundamente di Ruth i ta deseá di kasa kuné, pero tin un barera signifikante: tin un pariente mas yegá ku tambe tin un derecho riba e muhé i e tera. Si nos konsiderá Boaz di ta un tipo di Kristu, e situashon akí por revelá un asuntu den wega den e gran konflikto. Kristu ta stima nos, pero tin un “pariente mas yegá” ku tambe tin derecho: Satanas.

Kiko e siguiente pasashinan ta revelá tokante Satanas su pretenshon riba humanidat? (Job 1:6–11; Mat. 4:8,9; Judas 1:9; Lukas 22:31).

Ora Satanas a aparesé den e konsilio selestial, el a bisa Dios ku e tabata “bai bin riba tera” (Job 1:7), i ora Dios a puntr’é si el a nota e hustu Job, Satanas a reklam’é komo un di su mes, sugeriendo ku Job su kurason no tabata pertenesé realmente na Dios. Es desir, e ta siguiBo realmente solamente pasobra Bo ta bon p’é. Stòp di ta bon p’é i mira ken berdaderamente tin Job su lealtat.

Den Judas, nos ta mira un referensia breve na un storia ku tabata bon konosí den Israel: despues ku Moises a ser derá dor di Dios (Deut. 34:6), el a ser resusitá mas despues. Aunke nos no ta na altura di e detayenan, e teksto mes, ku ta bisa ku nan a diskutí riba e kurpa di Moises, ta impliká ku Satanas tabata hasiendo un tipo di reklamo riba dje.

“Pa promé biaha Kristu tabata na punto di duna bida na e mortonan. Miéntras ku e Prens di bida i esnan briante tabata aserká e graf, Satanas tabata spantá pa su supremasia.Ku su angelnan malbado el a para pa diskutí un invashon di e teritorio ku e tabata reklamá komo di dje. E tabata gaba ku e sirbidó di Dios a bira su prizoneru. El a deklará ku ni Moises no tabata kapas pa warda e lei di Dios; ku el a tuma pa su mes e gloria debí na Yehova, e mesun piká ku a kousa Satanas su deportashon for di shelu, i dor di transgreshon a bini bou di e dominio di Satanas.”—Ellen G. White, Patriarchs and Prophets, p. 478. Opviamente, Kristu a refutá Satanas su deklarashon, i Moises a resusitá (lesa Mat. 17:3).

Den Ruth 4:1–12, Boaz ta biaha pa e porta di Bethlehem, e stat kaminda Kristu lo a drenta nos mundu komo nos pariente yegá. E ansianonan ta reuní, i finalmente un sandalia (un símbolo di propiedat) ta ser interkambiá.

E porta di un pueblo ta kaminda kasonan tabata ser disidí: esaki ta un tipo di esena di huisio. E ta reflehá e esena di huisio di Daniel 7:13,14,22,26,27. Nos no mester pasa e aspekto krítiko di huisio akí por alto: huisio ta na “fabor di e santunan” pero solamente pasobra Kristu a paga e preis pa nos, meskos ku Boaz a hasi pa su brùit.

Haman i Satanas

Den e storia di Esther, nos ta topa Haman, kende tin hamber pa posishon i poder. E ta haña un gran grado di prominensia den e imperio, ariba di tur e otro prensnan (Esther 3:1).

Si nos lesa Ezekiel 28:11–15 i Isaias 14:12–15 tokante Lucifer, nos por haña algun paralelo ku Haman, un antagonista malbado di e pueblo skohí di Dios, ku ta nenga di bùig pa e supremasia di Dios. Satanas su intenshonnan general ta ser revelá den e storia di e tentashon di Kristu, kaminda e ta hiba Hesus na un lugá haltu pa mustr’E e reinonan di mundu (Mat 4:8–11). Kristu, manera nos a mira, a bini pa redimí mundu i reklam’é komo di djE, i El a hasié komo un di nos. Hesus ta e pariente redentor, i e preis ku El a paga pa redimí mundu tabata ekstremadamente haltu.

Den e buki di Revelashon, nos ta mira ku Satanas su pashon pa poder i adorashon ta hiba e mundu akí na su krísis final. Su engañonan ta konvensé mundu pa “keda asombrá” i sigui e bestia (Rev. 13:3,4, NKJV), eksepto eksepshonnan notabel ku ta nenga di ador’é. Huntu ku e hendenan akí, e ta rekurí na forsa.

Haman ta ripará ku Mordecai, un di e puebel skohí di Dios, lo no a sede na dje òf rekonosé loke e tabata kere ta su derecho di “adorá.” E ta “yená ku rabia” (Esther 3:5,6, NKJV), i e ta bira determiná pa eliminá henter e pueblo di Mordecai for di kara di tera.

Lesa Esther 3:1-14, Revelashon 12:14-17, i Revelashon 13:15. Ki paralelonan bo ta haña entre e pasashinan akí? Kon Juan su deskripshon di e iglesia remanente di Dios ta meskos ku e deskripshon di Haman di e pueblo di Dios?

Diabel a reklamá e mundu akí, pero e presensia di hendenan ku ta keda leal na Dios, ku ta warda Su mandamentunan, ta refutá su pretenshon di supremasia kompleto. “Ora e Sabat bira e punto spesial di kontroversia den henter kristianismo, e rechaso persistente di un minoria chikitu pa sede na e demanda popular lo hasi nan opheto di maldishon universal.”—Ellen G. White, Signs of the Times, 22 di febrüari 1910.

Pa un Tempu Manera Esaki

Tin un tendensia lamentabel bou di algun kristian pa keda pensa riba e kosnan difísil di profesia bíbliko. Nos ta mira ku tempunan di prueba ta nos dilanti, i e estudio di profesia por bira basá riba miedu, enfokando riba difikultat en bes di e resolushon primintí na e storia. Miéntras ku Dios no ta tapa futuro, i E ta honesto tokante eventonan ku lo tuma lugá entre awor i fin di e gran konflikto, semper ta importante pa lesa e storia te na final.

Tin un patronchi general den profesia den kua Dios ta revelá e bèrdat tokante e desórden kreá dor di nos rebelion humano, i E ta mustra nos e konsekuensianan. Pero despues semper E ta mantené speransa. Algun hende a wak e pronóstikonan di un krísis final, e “tempu di angustia di Jacob”, ku miedu i temblamentu. Indudablemente, e momentunan final lo no ta fásil pa e pueblo di Dios. Pero meskos ku e pronóstiko di tempunan difísil ta konfiabel, asina tambe e promesa di liberashon.

Den Revelashon 12, diabel ta persiguí e brùit di Kristu ku vengansa odioso, pero Dios ta intervení pa salb’é. E storia di Esther tambe tin un reina bunita ku ta hunga un ròl sentral den e drama, i Dios ta us’é poderosamente pa salba Su pueblo.

Lesa Esther 4:13,14; Esther 5:1-3; i Esther 9:20-28. Ki lèsnan nos por saka for di e pasashinan akí tokante nos situashon difísil den e momentunan final di historia di tera?

Dios a lanta Su iglesia remanente pa un momentu spesífiko den historia. Segun ku e 1.260 dianan di e Edat Skur tabata yega na un fin, Dios a saka Su brùit for di skondí (kompará ku Rev. 12:14) pa hiba Su último mensahe di mizerikòrdia, e mensahe di e tres angelnan, na mundu. Nos ta aki “pa un tempu manera esaki” (Esther 4:14).

Ester a deskubrí ku e no tabata su so ora el a enfrentá e persekushon ku ta ser lansá riba su pueblo dor di Haman: el a haña fabor di e rei, i su pueblo a ser librá finalmente. Nos tampoko ta nos so segun ku nos ta drenta e momentunan final di historia di tera: e Rei ta na nos banda, i e pueblo di Dios lo ser librá tambe.

“The First King of Israel,” p. 605, 606, den Patriarchs and Prophets.

“Satanas lo lanta indignashon kontra e minoria ku ta nenga di aseptá kustumbernan i tradishonnan popular. Hòmbernan di posishon i reputashon lo uni ku esnan sin lei i esnan falsu pa tuma konseho kontra e pueblo di Dios. Rikesa, genio, edukashon, lo kombiná pa tapa nan ku despresio. Gobernantenan, ministernan i miembronan di iglesia ku ta persiguí, lo konspirá kontra nan. Ku bos i pèn, atraves di gabamentu, menasa i ridikulisashon, nan lo trata na tumba nan fe. Pa medio di representashonnan falsu i apelashonnan rabiá, hende lo lanta e pashonnan di e pueblo. Pa motibu ku nan no tin un ‘Asina e Skrituranan ta bisa’ pa trese kontra e defensornan di e Sabat di Beibel, nan lo rekurí na promulgashonnan opresivo pa suministrá e falta. Pa sigurá popularidat i patronahe, legisladornan lo sede na e demanda pa leinan di djadumingu. Pero esnan ku ta teme Dios, no por aseptá un institushon ku ta violá un presepto di e Dekálogo. Riba e kampo di bataya akí lo ser bringá e ultimo gran konflikto den e polémika entre bèrdat i eror. I nos no a ser lagá den duda tokante e asuntu. Awe, meskos ku den e dianan di Esther i Mordecai, Señor lo vindiká Su bèrdat i Su pueblo.”—Ellen G. White, Prophets and Kings, p. 605,606.

Preguntanan pa Diskushon: