Den Salmonan: Parti 1

Lesa pa e Estudio di e Siman Akí:

Versíkulo di Memoria:

“E ora ei mi a wak, i ata, un Lamchi pará riba Seru Sion, i huntu kuné shentikuarentikuater mil, ku e nòmber di Su Tata skirbí riba nan frenta” (Revelashon 14:1, NKJV).

Komo Atventistanan di e di Shete Dia, nos tin kustumber di buska e símbolonan di Revelashon den e storianan di Tèstamènt Bieu pa yuda nos komprondé e símbolonan ei. E narativonan akí, ounke leu di ta e úniko bon fuente, ta ser hañá den henter Tèstamènt Bieu.

Un fuente di informashon partikularmente riku ta e buki di Salmonan, un kolekshon di poesia sagrado ku ta eksplorá hopi eksperensia humano i posibel interakshonnan ku Dios, ku ta varia di deskonsuelo riba piká i sufrimentu te na goso ekstrabagante den Su presensia i Su promesanan ripití pa pordon i salbashon.

Un lesamentu kuidadoso di e Salmonan ta produsí detayenan ku ta hasi e buki di Revelashon bira bibu, spesialmente Revelashon 14, ku ta deskribí e trabou final di e iglesia remanente di Dios riba tera. Dios su pueblo di e último dianan a ser duná e mesun tarea ku Israel di antigwedat: nos mester ta un lus pa e nashonnan, un último yamada mizerikòrdioso pa tur hende pa adorá i obedesé nan Kreador.

Algun detaye proveé den e buki di kantika di Dios por duna nos maneranan nobo pa komprondé i apresiá nos ròl den e momentunan final di historia di tera.

Nos Sumo Saserdote

Ora Moises a supervisá e konstrukshon di e tabernakel, e no tabatin pèrmit pa usa djis kualke diseño ku e tabata deseá. Dios a dun’é un mapa pa sigui. “Mira pa bo traha nan di akuerdo ku e patronchi ku a ser mustrá na bo riba e seru” (Eks. 25:40, NKJV). Nos ta deskubrí den e buki di Hebreonan ku e patronchi usá tabata esun di un realidat mas haltu, e santuario selestial.

Lesa Hebreonan 9:11–15, tokante Kristu komo nos Sumo Saserdote den e santuario di shelu. Kiko esaki ta siña tokante loke E ta hasiendo pa nos?

E santuario terenal a prefigurá Hesus den detaye asombroso, for di e saserdote i e ofrendanan te na e muebelnan i otro detayenan di diseño. Tur esaki ta papia di Hesus.

E buki di Revelashon, naturalmente, ta masha riku na imágennan di santuario. Nos ta haña e kandelar di santuario den e promé versíkulonan, e arka di aliansa menshoná eksplísitamente den kapítulo kuater, i numeroso otro alushonnan na e tèmpel. Sin un komprondementu di e santuario di Tèstamènt Bieu, ta bira imposibel pa kapta kiko Juan ke bisa den su deskripshonnan di su vishonnan. E eksperensianan di Israel, Pablo ta skirbi, “a sosodé ku nan komo ehèmpel, i nan a ser skirbí pa nos atvertensia, riba ken e finnan di siglonan a bin” (1 Kor. 10:11, NKJV).

Tin hopi kos ku nos por siña ora nos studia e detayenan di e tèmpel. Den e buki di Salmonan, nos ta haña un komponente importante pa komprondé algun di e detayenan akí: kon e pueblo di Dios tabata relashoná personalmente ku e tèmpel. Nos ta kapta bistanan di kon David a relashoná ku e santuario i su servisionan, i nos ta mira e reakshon di kurason di e pueblo di Dios riba loke e Mesias lo a hasi pa nan. No ta djis e patronchinan ta yuda nos mira Hesus; nos por studia tambe e eksperensianan personal di esnan ku a komprondé kiko Dios tabata siñando nos atraves di e santuario i saka lèsnan pa nos mes i pa nos propio eksperensianan ku Dios.

Lesa Salmo 122. Aunke nos no por bai literalmente na e “kas di SEÑOR” terenal (e no t’ei, i asta si un a ser konstruí na e mesun lugá, e lo tabata insignifikante), ki elementonan ta ser hañá den e salmo akí ku por enkurashá nos tokante loke Kristu a hasi pa nos? Tuma nota di e temanan di pas, seguridat, alabansa, i huisio.

Riba Seru Sion

Den Revelashon 14, nos ta haña e pueblo di Dios pará riba Seru Sion. E Seru Sion original tabata situá djis wèst di e stat bieu di Jerusalèm di awe i tabata ser konsiderá komo e sede, òf presensia, di Dios su trono, meimei di Su pueblo. Ku tempu, e seru di tèmpel, situá riba Seru Moriah, a bin ser identifiká ku Seru Sion tambe.

Ku otro palabra, e deskripshon importante akí di e remanente di Dios di último dianan ta ser presentá den lenguahe di santuario, manera ku mayoria di e esenanan klave den e buki di Revelashon. Danki na e Lamchi, e pueblo di Dios ta riba Su seru santu!

Lesa Salmo 15 i Salmo 24, den kua David ta hasi un pregunta sumamente importante: “Ken lo biba den Bo seru santu?” Kompará su kontesta den e salmonan akí ku e deskripshon di e hendenan pará riba Sion den Revelashon 14:1–5. Ki paralelonan bo ta haña? Kon un hende ta uni ku e grupo akí? Kiko ta nifikashon di e echo ku e nòmber di e Tata ta inskribí riba nan frenta? (Rev. 14:1).

E deskripshon hañá den e salmo di David di esnan pèrmití den presensia di Dios ta un tarea basta grandi pa simpel pekadornan kumpli kuné. Ken entre nos por bisa honestamente ku semper nos a kana rektamente? Of semper a papia bèrdat den nos kurason (Salmo 15:2)? Ningun di nos por bisa ku nos “lo no ser moví nunka” (Salmo 15:5, NKJV). Si nos bisa ku nunka nos a peka, Beibel ta siña ku nos no tin bèrdat den nos (1 Juan 1:8).

Nos no por yega na otro konklushon ku ta e Lamchi ta kapasitá nos pa para riba Sion. E Lamchi no ta ser menshoná den e salmo di David, ma diripiente E ta aparesé den e deskripshon hañá den Revelashon 14. Ta kasi komo si fuera Revelashon 14 ta kontestando e pregunta di David. Awor ku e Lamchi di Dios ta establesé riba Seru Sion, den e santuario, nos tambe por ta presente einan pa motibu di Su hustisia perfekto akreditá na nos pa medio di fe. Nos por tin e “kurashi pa drenta e Lugá Santísimo pa medio di e sanger di Hesus, pa medio di un kaminda nobo i bibu ku El a konsagrá pa nos, atraves di e velo, esta, Su karni” (Hebr. 10:19,20, NKJV). Sin Su sanger, ki speransa nos lo tabatin? Ningun, realmente.

Lei den Nos Kurason

E remanente reuní riba Sion tin un nòmber grabá riba nan frenta: e nòmber di e Tata i e Lamchi. (Ta dudoso si esaki ta dos nòmber diferente; Hesus ta e imágen mes di e Tata!) Un “nòmber” den Skrituranan ta nifiká mas ku un etiketa pa medio di kua hende ta dirigí nan mes na otro; e ta para pa karakter. Te awe, hopi kultura ainda ta bisa ku un hende tin un “bon nòmber” ora hende ta pensa faborabel di nan karakter.

Lesa Eksodo 33:18-23, Eksodo 34:1-7, i Salmo 119:55. Ora Moises a pidi pa mira e gloria di Dios, kiko Dios a primintí di mustr’é? E ora ei, ora Dios a proklamá Su nòmber na Moises (Eks. 34:5), kiko a sigui?

Algun hende ta imaginá e gloria di Dios komo un lus briante i inaksesibel, loke sigur ta un deskripshon apropiá. Pero e gloria di Dios ta mas ku simplemente un ekshibishon visual; Su gloria ta Su karakter. Meskos ta konta pa e nòmber di Dios.

Ora Beibel ta deskribí un remanente ku e nòmber di Dios grabá riba nan frenta, no ta un asuntu di tin lèternan literal skirbí einan; ta un asuntu di tin e karakter di Dios grabá den bo mente, bo kurason, i asina awor den nos bida nos ta reflehá e amor i karakter di Dios. Bo a ser halá serka di Dios, i bo ta stim’E pa ken E ta i loke El a hasi pa bo.

Kon interesante ta, tambe, ku ora Dios ta deskribí Su mes na Moises, E ta hasié konhuntamente ku ora Moises ta risibí un otro kopia di e Dies Mandamentunan, ku tambe ta un transkripshon di Su karakter. Di mes manera, e hendenan ku tin e “nòmber” di Dios den Revelashon 14 ta ser deskribí komo esnan ku “ta warda e mandamentunan di Dios.” E ora ei, tuma nota di e palabranan hañá den Hebreonan: “Esaki ta e aliansa ku lo Mi sera ku nan despues di e dianan ei, SEÑOR ta bisa: Lo Mi pone Mi leinan den nan kurason, i den nan mente lo Mi skirbi nan.” Despues E ta agregá: “Nan pikánan i nan echonan ilegal lo Mi no kòrda mas” (Hebr. 10:16,17, NKJV). Ki un ekspreshon di e evangelio: aunke e lei di Dios ta reflehá den nos bida, ainda nos mester pa nos pikánan “no” ser rekordá “mas.”

E nòmber di Dios ta Su karakter. Su lei moral ta un transkripshon di Su karakter. I esnan ku ta reuní riba e seru santu di Dios den e último dianan ta saturá ku un amor pa Dios, un amor manifestá atraves di obediensia na Su lei.

Salmo 5

Lesa Salmo 5. Den e obra akí, David ta hala kontrastenan skèrpi entre esnan ku ta pèrdí i esnan ku a ser redimí. Kompará e salmo akí ku e lenguahe di Revelashon 14:1–12. Ki similaridatnan bo ta haña, i kon esaki ta informá bo komprondementu di kiko ta nifiká pa ta parti di Dios su movemento remanente di e último dianan?

Ta instruktivo pa nota ku David ta insistí ku maldat “no por biba” huntu ku Dios (Salmo 5:4, ESV). E punto di e tabernakel tabata pa Dios lo por a biba meimei di Su pueblo, i esei lo ta e kaso tambe den e reino di Kristu (lesa Rev. 21:3). Esnan ku ke aserká e trono di Dios mester ser redimí.

Tambe ta notabel ku David ta deskribí un akto di adorashon den Salmo 5:7, ku ta e kuestion sentral den wega den e gran konflikto. Revelashon 13 ta menshoná “adorashon” sinku biaha, i e mensahenan di e tres angelnan ta yama mundu pa “adorá Esun ku a traha.” David ta bisa nos ku e “ta teme” Dios, i e mensahe di e remanente ta yama mundu bèk pa “teme Dios i dun’E gloria, pasobra e ora di Su huisio a yega” (Rev. 14:7, NKJV).

Tuma nota tambe kon e redimínan di Revelashon 14 ta ser bisá di “no tin engaño” (Rev. 14:5, NKJV) den nan boka; nan ta papiadónan di bèrdat kende nan palabranan i echonan ta reflehá e karakter hustu di Dios. E malbadonan, di akuerdo ku David, “no tin bèrdat den nan boka” (Salmo 5:9, ESV).

Ta un esena asombroso ku Juan ta presentá den e parti klave akí di Revelashon: simpel pekadornan a ser halá bèk for di morto i ta privilegiá di para den presensia di Dios. Nan no a gana e derecho akí; e ta ser otorgá na nan dor di e echo ku e Lamchi di Dios, e Yu di Hende hustu, ta para einan huntu ku nan. Nan ta pordoná, redimí; nan no tin mester di karga nan mes kulpa mas (kompará ku Salmo 5:10), pasobra e Lamchi di Dios a karg’e pa nan (kompará ku Isa. 53:12 i 2 Kor. 5:21).

Unabes ku e nòmber di Dios ta grabá den bo kurason, ta difísil pa keda ketu. E pueblo di Dios ta entregá un último oferta di mizerikòrdia ku un “bos duru” (Rev. 14:7). “Ma laga tur esnan ku ta pone nan konfiansa den Bo regosihá; laga nan grita di alegria semper, pasobra Bo ta defendé nan; laga esnan ku ta stima Bo nòmber alegrá nan mes den Bo” (Salmo 5:11, NKJV).

Siña Transgresornan Bo Manera

Despues ku Señor a aparesé na Isaias den e esena di sala di trono di Isaias 6:1–8, i despues ku Isaias a ser bisá ku su “inikidat a ser kitá” i su “piká purifiká,” e ora ei el a kontestá e yamada di Dios bisando: “Atami aki! Mandami” (Isa. 6:8, NKJV). Es desir, unabes ku e tabata sa ku e tabata bon ku Dios, i apesar di a konosé su fayonan, e tabata kla pa traha pa Señor.

No ta sosodé meskos ku nos? Kon nos por proklamá salbashon na otronan si nos mes no tin e? I nos por tin e, pa medio di fe den Hesus i loke El a hasi pa nos.

Lesa Salmo 51:7-15. Kiko David ta primintí di hasi despues ku el a ser pordoná i purifiká di su piká?

Ser yamá den e presensia di Dios ta, finalmente, ser mandá bèk pafó. Den Su sabiduria, Dios a enkargá e redimínan pa sirbi komo Su bos prinsipal na un mundu kaí. Na sierto momentu, e impakto di Su pueblo riba tera ta bai ser sintí poderosamente. Revelashon 18:1 ta bisa nos ku Su súplika final na e planeta kaí lo iluminá henter mundu.

“Tan pronto ku un hende bini serka Kristu, ta nase den su kurason un deseo pa hasi konosí na otronan ki un amigu presioso el a haña den Hesus; e bèrdat ku ta salba i santifiká no por ser será den su kurason. Si nos ta bistí ku e hustisia di Kristu i ta yená ku e goso di Su Spiritu ku ta biba den nos, nos lo no por keda ketu. Si nos a purba i a mira ku Señor ta bon, nos lo tin algu di konta. Meskos ku Felipe ora el a haña e Salbador, nos lo invitá otronan den Su presensia.”—Ellen G. White, Steps to Christ, p. 78.

Den Revelashon 14, e mensahenan di e tres angelnan ta fundá riba e “evangelio eterno” (Rev. 14:6). Es desir, asta promé ku e proklamashonnan sali tokante adorá esun “ku a traha shelu i tera, laman i fuentenan di awa” (Rev. 14:7, NKJV) òf tokante e kaida di Babilonia (Rev. 14:8) òf tokante adorá e “bestia i su imágen” (Rev. 14:9), e fundeshi di e evangelio, di salbashon den Hesus, ta ser proklamá. I esei ta pasobra e spièrtamentunan i mensahenan di e tres angelnan no ta nifiká nada fuera di e speransa i promesa ku esnan ku ta proklamá e mensahenan akí tin den Hesus i loke El a hasi pa nan. Aparte di e “evangelio eterno,” realmente nos no tin nada di balor pa bisa mundu.

“E salmonan di David ta pasa dor di henter e skala di eksperensia, for di e profundidatnan di kulpa konsiente i kondenashon propio te na e fe di mas haltu i e komunikashon di mas eksaltá ku Dios. Su registro di bida ta deklará ku piká por trese solamente bèrgwensa i ai, pero ku e amor i mizerikòrdia di Dios por yega te na e profundidatnan di mas profundo, ku fe lo hisa e alma arepentí pa kompartí e adopshon di e yunan di Dios. Di tur e siguransanan ku Su palabra ta kontené, e ta un di e testimonionan di mas fuerte na fabor di e fieldat, e hustisia, i e mizerikòrdia di e pakto di Dios....

“ ‘Mi a hura na David, Mi sirbidó ... ku ken Mi man lo ser establesé: Mi brasa tambe lo fortales’é. Mi fieldat i Mi mizerikòrdia lo ta kuné: i den Mi nòmber su kachu lo ser halsá. Lo Mi pone su man tambe den laman, i su man drechi den e riunan. E lo sklama na Mi: Bo ta mi Tata, mi Dios, i e Baranka di mi salbashon. Tambe lo Mi hasié Mi primogénito, mas haltu ku e reinan di tera. Mi mizerikòrdia lo Mi warda p’e pa semper, i Mi aliansa lo keda firme kuné.’ Salmo 89:3–28.”—Ellen G. White, Patriarchs and Prophets, p. 754, 755.

Preguntanan pa Diskushon: