E Mata ku ta Kima

Lesa pa e Estudio di e Siman Akí:

Versíkulo di Memoria:

“I SEÑOR a bisa: ‘Siguramente Mi a mira e opreshon di Mi pueblo ku ta na Egipto, i a tende nan sklamashon pa motibu di nan kapatasnan, pasobra Mi konosé nan tristesanan. Asina Mi a baha pa libra nan for di man di e egipsionan, i pa hiba nan for di e tera ei pa un tera bon i grandi, pa un tera ku ta flui lechi i miel’ " (Eksodo, 3:7,8, NKJV).

E yamada di Dios na nos hopi biaha lo kambia e direkshon di nos bida. Sinembargo, si nos sigui e yamada ei, e ora ei nos ta deskubrí ku e kaminda di Dios semper ta e mihó ruta pa nos. Sinembargo, tin biaha, na prinsipio, no ta fásil pa aseptá e yamada di Dios. Esei ta e kaso pa Moises i su yamada di Dios, ku spesífikamente a kuminsá na e enkuentro ku Señor na e mata ku ta kima. Aunke kisas Moises por tabata sa òf no tokante e leinan di kombustion, e tabata sa ku loke e tabata mira tabata un milager, i esei siguramente a kapta su atenshon. No tin duda, Señor tabata yam’é pa un tarea spesífiko. E asuntu tabata: E lo a kontestá e yamada, sin importá e kambio nobo radikal den su bida ku e yamada akí lo a trese kuné? Na promé instante, e no tabata masha reseptivo na dje.

Bo por kòrda kasonan ora bo tabatin metanan spesífiko, pero Dios a redirigí e plannan ei. Ta bèrdat ku nos por ta útil pa Dios na hopi manera, pero sigui e yamada di Dios den nos bida, i hasi loke E ta guia nos pa hasi, siguramente ta e kaminda na e eksistensia di mas satisfaktorio. Kisas e lo no ta fásil semper, i e no tabata fásil pa Moises, pero kon bobo ta pa bai nos mes kaminda ora Dios ta yamando nos den un otro direkshon.

E Mata Ku ta Kima

Despues ku Moises a hui bai Midian, e tabatin un bida relativamente fásil. El a kasa, tabatin dos yu hòmber, Gershom i Eliezer (Eks. 18:3,4), i tabata parti di e famia ekstendé di Jethro, su suegro i un saserdote na Midian. El a pasa 40 aña relahá komo un wardadó di karné, meskos ku David (2 Sam. 7:8), disfrutando di e presensia di Dios, spesialmente manera ta ser revelá den naturalesa.

Sinembargo, e tempu akí no tabata simplemente pa Moises hole e flornan (òf kisas, den e kaso akí, e káktus di desierto?). E añanan akí di kana ku Señor a kambi’é i a prepar’é pa un ròl di liderazgo. Dios a usa Moises tambe den e desierto ketu akí pa skirbi, bou di inspirashon divino, dos di e bukinan bíbliko di mas bieu: Job i Génesis (lesa Ellen G. White, Patriarchs and Prophets, p. 251; Francis D. Nichol, et al., eds., The SDA Bible Commentary, tomo 3, p. 1140). Tambe Moises a risibí di Dios persepshon krusial tokante e gran konflikto, e Kreashon, e Kaida, e Diluvio, e patriarkanan, i, mas importante ainda, e plan di salbashon. Pues, Moises tabata instrumental pa a transmití na henter humanidat e berdadero konosementu di e Dios bibu, nos Kreador i Sostenedó, i konosementu tokante kiko Dios ta hasiendo en bista di e piká ku a kousa ruina riba e planeta akí. Historia bíbliko i di salbashon tin tiki sentido fuera di e fundeshi krusial ku, bou di inspirashon, Moises a duna nos, spesialmente den e buki di Génesis.

Lesa Eksodo 3:1-6. Ki nifikashon por ser hañá den e echo ku Señor a introdusí Su mes na Moises komo “e Dios di Abraham, e Dios di Isaac, i e Dios di Jacob”?

Moises a mira ku e mata ku ta kimando no tabata ser konsumí dor di e kandela, i asina e tabata sa ku e tabata mira un milager i ku algu dramátiko i importante mester tabata tumando lugá nèt su dilanti. Segun ku e tabata yega mas serka, Señor a bis’é pa kita su sapatu komo un señal di rèspèt profundo pasobra e presensia di Dios a hasi e lugá santu.

Señor a presentá Su mes na Moises komo “e Dios di Abraham, e Dios di Isaac, i e Dios di Jacob” (Eks. 3:6). Señor a primintí e patriarkanan akí ku nan desendientenan lo a heredá Canaan, un promesa ku Moises siguramente tabata sa di dje. Pues, asta promé ku El a bis’e, Dios tabata habri kaminda kaba pa Moises sa kiko tabata bini i ki ròl krusial e mester a hunga.

Moises tabatin mester di 80 aña promé ku Dios a konsider’é kla pa su tarea. Kiko e bèrdat akí lo por siña nos tokante pasenshi?

E Angel di Señor

“E angel di Señor” a aparesé na Moises den vlamnan di kandela “for di denter di un mata” (Eks. 3:2, NIV). Tabata Señor Hesus Mes papiando ku Moises “for di denter di e mata” (Eks. 3:4, NIV).

No sea konfundí ku e título “angel di Señor” komo un representashon di Hesu-Kristu. E término angel mes ta nifiká simplemente “mensahero” (hebreo mal’akh), i semper ta dependé di e konteksto si e angel akí mester ser interpretá komo humano òf divino (lesa Mal. 3:1). Tin hopi kaso den Beibel kaminda “e angel di Señor” ta referí na e persona divino (studia, por ehèmpel, Gen. 22:11,15–18; Gen. 31:3,11,13; Huesnan 2:1,2; Huesnan 6:11–22; Zak. 3:1,2). E angel di Señor akí no solamente ta papia den nòmber di Señor, sino E ta Señor Mes. Hesus ta e mensahero di Dios pa komuniká e Palabra di e Tata na nos.

Lesa Eksodo 3:7–12. Kon Dios a splika Moises dikon E ker a intervení, na nòmber di e israelitanan sklabisá na Egipto?

E sufrimentu di e pueblo di Dios na Egipto ta ser deskribí na un manera kolorido komo un kehamentu i un gritu profundo pa yudansa. Dios a tende nan gritu i tabata preokupá (Eks. 2:23–25). El a yama nan “Mi pueblo” (Eks. 3:7). Es desir, asta promé ku Sinai i ratifikashon di e pakto, nan tabata Su pueblo, i E lo a laga nan biba i prosperá (si nan lo a obedesé) den e tera di Canaan, manera El a primintí nan tatanan.

Dios a bisa Moises ku E tabata mand’é serka Fárao pa un tarea spesífiko: “Awor, bai, Mi ta manda bo serka Fárao pa saka Mi pueblo, e israelitanan, for di Egipto” (Eks. 3:10, NIV). Atrobe, Dios ta yama nan “Mi pueblo.”

Ki un tarea Dios a presentá na Su sirbidó! P’esei, Moises a kontestá ku un pregunta: “Ken mi ta?” Es desir, kaptando e nifikashon di loke ta bai pasa i kiko su ròl ta bai ta den tur esaki, Moises ta puntra su mes dikon un hende manera e mes lo a ser skohé. Aki, ya kaba, nos tin un indikashon di su karakter, su humildat, i su sentido ku e ta indigno di loke e ta ser yamá pa hasi.

E Nòmber di Señor

Lesa Eksodo 3:13-22. Dikon Moises tabata ke sa e nòmber di Dios, i kiko ta e nifikashon di Su nòmber?

Dios ta presentá Su mes na Moises komo “’ehejeh ’asher ’ehejeh ,” ku literalmente ta nifiká “Lo Mi ta ken lo Mi ta,” òf “Mi ta ken Mi ta.” Den Eksodo 3:12, Dios ta usa e mesun verbo ’ehejeh ku den versíkulo 14, ora E ta deklará na Moises: “Lo Mi ta” (ku bo). E ta nifiká ku Dios ta eterno. E ta e Dios trasendental, meskos ku e Dios inmanente, i E ta biba huntu ku esnan “ku ta arepentí i humilde den spiritu” (Isa. 57:15, NRSV).

E nòmber korekto di Dios, “Yahweh” (tradusí den Beibelnan na papiamentu generalmente komo “Señor”), tabata konosí pa e pueblo di Dios for di prinsipio, asta si nan no tabata sa su nifikashon mas profundo. Moises tambe tabata konosé e nòmber Yahweh, pero, meskos ku otro hende, e no tabata sa e berdadero nifikashon. Su pregunta: “Kon ta Bo nòmber?” ta un pregunta tokante e nifikashon mas profundo ei. Un sugerensia útil ta den Eksodo 6:3, kaminda Dios a deklará: “Mi a aparesé na Abraham, na Isaac i na Jacob komo Dios Todopoderoso, pero pa medio di Mi nòmber SEÑOR Mi no a hasi Mi mes totalmente konosí na nan” (Eks. 6:3, NIV). E no ta nifiká ku Adam, Noe, Abraham, i e patriarkanan no tabata konosé e nòmber “Yahweh” (lesa Gen. 2:4,9; Gen. 4:1,26; Gen. 7:5; Gen. 15:6–8; etc.). E ta nifiká, en kambio, ku nan no tabata sa su nifikashon mas profundo.

Su nòmber, Yahweh, ta mustra riba e echo ku E ta e Dios personal, e Dios di Su pueblo, e Dios di e pakto. E ta un Dios íntimo i serka, ku ta intervení den asuntunan humano. E Dios Todopoderoso (Gen. 17:1) ta e Dios ku a intervení milagrosamente pa medio di Su poder. Pero Yahweh ta un Dios ku ta demostrá Su poder moral pa medio di amor i kuido. E ta e mesun Dios ku Elohim (“Dios trasendental, poderoso i fuerte,” e “Dios di tur hende,” “e Gobernante di universo,” “e Kreador di tur kos”), pero diferente aspekto di Su relashon ku humanidat ta ser revelá dor di e nòmber Yahweh mes.

Konosé e nòmber òf yama riba e nòmber di Dios no ta algu mágiko. E ta tokante un proklamashon di Su nòmber, loke ta nifiká siña otronan e bèrdat tokante e Dios akí i e salbashon ku E ta ofresé na tur ku ta bini den fe. Manera Joel ta bisa: “Tur ku yama riba e nòmber di SEÑOR lo ser salbá” (Joel 2:32, NIV).

Kuater Eksküs

Lesa Eksodo 4:1-17. Ki sèt di señalnan Dios a duna Moises pa realisá, pa asina fortalesé su posishon komo mensahero di Dios?

Moises a bolbe purba diskulpá su mes di e tarea ku Dios a pidi di dje (lesa Eks. 3:11). E no ker a bai Egipto i konfrontá Fárao. Despues di tur kos, el a frakasá kaba ora el a purba anteriormente, riba su mes, pa yuda e hebreonan. Tambe, su mes hendenan no tabata kere den dje òf asept’é komo nan lider. Ta p’esei el a formulá un di tres opheshon: “Ke tal si nan no keremi òf skuchami?” (Eks. 4:1, NIV). Esaki no tabata un pregunta pa siña algu nobo; e tabata un intento pa bisa nò na e responsabilidat ku Dios a pidié tuma.

Dos señal milagroso ta ser duná na Moises pa realisá dilanti di e ansianonan di Israel i, despues, dilanti di Fárao:

1. su bara ta bira un kolebra i despues bira un bara bèk, i
2. su man ta bira leproso pero despues ta kura mesora.

Tur dos milager mester konvensé e ansianonan ku Dios ta obrando pa nan. Pero si no, e di tres milager, esun di kombertí awa den sanger, a ser agregá (Eks. 4:8,9).

Aunke Dios a duna Moises e maravianan poderoso akí, ainda e ta ekspresá un otro èksküs, e di kuater: e no por papia bon.

Lesa Eksodo 4:10-18. Kon Señor ta kontestá Moises, i ki lèsnan nos por saka for di esei pa nos mes, den kualke situashon ku nos ta kere ku Dios ta yama nos?

E sèt di kuater èksküs akí ta mustra e desgana di Moises pa sigui e yamada di Dios. Ku opheshonnan “rasonabel”, e ta enmaskará su falta di boluntat pa bai. E promé tres èksküsnan ta den forma di pregunta:

1. Ken ami ta?
2. Ken Abo ta? i
3. Ke tal si nan no keremi?
I e di kuater opheshon ta e deklarashon:
4. “Mi no ta elokuente.”

Dios a reakshoná riba nan tur i a trese un solushon poderoso. Riba e èksküsnan akí Dios ta presentá hopi promesa edifikante.

Despues Moises ta entregá su di sinku i último súplika i ta pidi direktamente: “O mi Señor, por fabor manda un otro hende” (Eks. 4:13, NRSV). Komo kontesta, Dios ta bis’é ku E ta mandando su ruman hòmber, Aaron, kaba pa topa kuné pa sosten. Finalmente, Moises ta atmití silensiosamente i ta pidi Jethro pa su bendishon promé ku e sali pa Egipto.

E Sirkunsishon

Lesa Eksodo 4:18–31. Kon nos ta komprondé e storia straño akí, i ki lès nos por saka for di dje?

Studiantenan di Beibel ta keda sorprendí ora nan lesa ku, despues ku Moises a obedesé Señor i a kuminsá su biahe bèk pa Egipto, Señor “tabata serka di mat’é” (Eks. 4:24, NIV). For di e konteksto di e storia, ta evidente ku e asuntu tabata sirkunsishon. Su yu di mas chikitu no tabata sirkunsidá, manera e pakto abrahámiko tabata demandá (Gen.. 17:10,11).

Moises, komo e lider di e pueblo di Dios, mester a mustra su sumishon i obediensia perfekto na Dios, pa asina e por tabata kualifiká pa guia otro hende pa ta obediente. E mester tabata un modelo di e entrega total ei na Dios. Su kasá, Zipporah, tabata un muhé di akshon i a sirkunsidá su yu hòmber pa asina salba bida di su esposo. El a mishi ku Moises ku e “prepusio sangriente,” i e sanger akí ta representá ekspiashon, bida i seyamentu di e pakto. E echo ku el a ser hasí asina rápido a agregá na e drama di e situashon.

Un lès importante por ser siñá for di e episodio akí: nunka faya di hasi loke nos sa ta korekto.

“Riba kaminda for di Midian, Moises a risibí un spièrtamentu spantoso i teribel di e malkontentu di Señor. Un angel a aparesé na dje den un forma menasante, komo si fuera e lo a destruyé inmediatamente. Ningun splikashon a ser duná; ma Moises a kòrda ku el a deskonsiderá un di e rekisitonan di Dios... el a neglishá di realisá e sirkunsishon riba su yu hòmber mas chikitu. E no a kumpli ku e kondishon pa medio di kua su yu por tabatin derecho riba e bendishonnan di e pakto di Dios ku Israel; i un negligensia asina di parti di nan lider skohí no por a keda sin mengua e forsa di e preseptonan divino riba e pueblo. Zipporah, ku miedu ku su kasá lo a ser matá, e mes a realisá e rito, i despues e angel a permití Moises pa sigui su biahe. Den su mishon na Fárao, Moises mester a ser poné den un posishon di gran peliger; su bida por a ser konservá solamente atraves di protekshon di angelnan santu. Pero miéntras e tabata biba den negligensia di un deber konosí, e lo no tabata sigur; pasobra e no por a ser protehá dor di e angelnan di Dios.”—Ellen G. White, Patriarchs and Prophets, p. 255,256.

Lesa Ellen G. White, “Moses,” p. 251–256, den Patriarchs and Prophets.

E yamada dramátiko di e mata ku ta kima tabata probablemente e eksperensia di mas transformativo den bida di Moises. Tur otro punto haltu den su bida tabata dependé riba su kontesta obediente i positivo na e echo ku Dios a enkarg’é pa saka e hebreonan for di Egipto i hiba nan na e Tera Primintí.

Sigur, nos sa awor kon tur kos a resultá. Pero pone bo mes na lugá di Moises na momentu di e mata ku ta kima. El a hui for di Egipto pa salba su bida. Un generashon nobo di hebreonan a bini riba esena durante e 40 añanan, di ken hopi probablemente tabata sa poko di dje, òf kisas asta loke nan a tende tokante dje tabata robes, filtrá atraves di storianan ku, ku tempu, ta ser trosé. I tòg awor, el a ser yamá dor di Dios pa saka e mesun pueblo akí for di un nashon poderoso? No ta nada straño ku e tabata dudoso na promé instante!

Sí, e tabata un tarea sumamente eksigente, pero imaginá kiko lo el a pèrdè si el a duna un nò final na Dios. Kisas e lo por a djis disparsé den historia en bes di, pa medio di e poder di Dios obrando den dje, literalmente traha historia i bira un di e hendenan di mas grandi i di mas influyente, no solamente den Beibel sino den mundu mes.

Preguntanan pa Diskushon: