Eksodo:

E Dios revelá den e buki di Eksodo ta e Señor amoroso ku na e tempu stipulá, i ku Su akshonnan poderoso, a trese salbashon i liberashon na Su pueblo (Gen. 15:12–16). E éksodo for di Egipto i e krusamentu di Laman Kòrá tabata susesonan krusial i úniko, Dios su aktonan espektakular i maravioso. Ningun suseso mas grandi òf mas glorioso a yega di sosodé den historia di Israel antiguo promé ku e Krus. E ta e evangelio, pero segun Moises.

Dios a lanta milagrosamente i repetidamente pa demostrá Su kuido i protekshon pa e hebreonan, apesar di nan apostasia konstante. Su mizerikòrdia a surpasá tur nan komprondementu i sintimentunan. Ku Su brasa ekstendé, Señor a guia Su pueblo na libertat. E tabata un akto sin presedente. E seri inesperá akí di intervenshonnan divino tabata e komienso di nan biahe renobá ku Dios, un biahe for di Egipto pa (finalmente) Canaan.

Aunke Moises ta hunga un ròl importante den Eksodo, e buki akí no ta tokante Moises sino tokante Dios, e Dios di amor, bèrdat, hustisia, libertat, i pordon, e Dios ku finalmente a bai na krus pa nos. Dor di studia Eksodo, nos ta haña un bista úniko di kon nos Dios ta realmente.

I kon E ta realmente? E ta un Dios ku tabata fiel na Su pueblo apesar di nan infieldat. E tabata konstantemente pa nan, asta ora nan tabata kontra di djE. Bes tras bes, El a mustra nan Su mizerikòrdia, tresiendo enkurashamentu, korekshon, i instrukshon divino. Guiando nan na e mihó manera posibel, E tabata ke pa nan, boluntariamente, pa amor p’E i Su karakter, adorá i obedesé, tur pa nan mes bon.

E Dios di Moises ta e Dios di relashonnan. E ophetivo di mas importante di Dios no tabata pa kumpli ku algu òf pa kumpli ku un agènda; en kambio, Su ophetivo prinsipal tabata pa krea un relashon signifikante ku Su pueblo skohí, Israel. El a hiba nan na Sinai pa asina establesé e komunion profundo akí.

Apòstel Pablo ta siña ku loke a pasa ku e pueblo di Dios den pasado ta un lès ophetivo pa nos pa nos por siña di nan erornan i sigui Señor fielmente awe: “Awor e kosnan akí a pasa ku nan komo un ehèmpel, ma nan a ser skirbí pa nos instrukshon, riba kendenan e fin di siglonan a bin” (1 Kor. 10:11, ESV). E susesonan di pasado akí mester ta un spièrtamentu i un fuente di instrukshon inolvidabel pa nos awor. Nos mester lesa nan, studia nan, i siña for di nan, pasobra no importá kon diferente e sirkunstansianan ta, e prinsipionan spiritual tras di nan ta keda mesun kos.

Nos plan pa studia e buki di Eksodo durante e 13 simannan akí ta transparente. E buki ta dividí den lesamentu semanalmente di kapítulo di vários largura (dividí temátikamente pa komodidat):

1. Sklabitut na Egipto, nasementu di Moises, i Moises su promé 40 añanan (Eksodo 1,2)
2. Enkargo di Moises (Eksodo 3,4)
3. Komplikashonnan: ora bida bira pió (Eksodo 5,6)
4. E promé nuebe plaganan (Eksodo 7–10)
5. E di dies plaga i e selebrashon di Pasku (Eksodo 11,12)
6. E liberashon for di Egipto, i e eksperensia di Laman Kòrá (Eksodo 13–15)
7. E biahe pa Seru Sinai (Eksodo 16–18)
8. E don di e pakto di Dios i e Dekálogo (Eksodo 19,20)
9. E lei di Dios apliká (Eksodo 21–23)
10. E pakto konfirmá i e mapa di e tabernakel (Eksodo 24–31)
11. E apostasia di e bisé di oro i e interseshon di Moises (Eksodo 32)
12. Dios su revelashon propio i e kara radiante di Moises (Eksodo 33,34)
13. E tabernakel konstruí i dediká (Eksodo 35–40)

Kada siman nos ta enfoká riba pasashinan klave i susesonan for di kapítulonan indiká. E éksodo for di Egipto i e krusamentu di Laman Kòrá tabata susesonan krusial i úniko, Dios su aktonan espektakular i maravioso.

Ku nos Señor mizerikòrdioso bendishoná nos segun ku nos ta studia e buki esensial akí ku ta rekordá nos kon Dios ke guia Su pueblo for di sklabitut na libertat, for di morto pa bida, i for di desierto pa Jerusalèm Nobo (Hebr. 12:22).