Komienso Difísil

Lesa pa e Estudio di e Siman Akí:

Versíkulo di Memoria:

“Despues Moises i Aaron a bai i a bisa Fárao: ‘Asina SEÑOR Dios di Israel ta bisa: Laga Mi pueblo bai, pa nan por tene un fiesta pa Mi den desierto.’ I Fárao a bisa: ‘Ken ta SEÑOR, ku mi mester obedesé Su bos i laga Israel bai? Mi no konosé SEÑOR, ni lo mi laga Israel bai’ ” (Eksodo 5:1,2, NKJV).

Hopi kreyente ta pensa ku ora un hende disidí di sigui Dios, e lo eksperensiá solamente felisidat, prosperidat i éksito. Esei no nesesariamente ta e kaso, sinembargo, manera Beibel mes ta mustra hopi bes. Tin biaha hopi opstákulo ta aparesé, komo tambe difikultatnan nobo. Esaki por ta masha frustrante, i e ta lanta preguntanan difísil ku no semper tin kontesta fásil òf, ta parse, kualke kontesta mes.

Esnan ku ta konfia den Dios lo enfrentá numeroso prueba. Ora nos perseverá, sinembargo, Dios ta trese solushonnan ku ta bini riba Su términonan i den Su tempu. Su maneranan por ta den konflikto ku nos ekspektativanan pa solushonnan rápido i instantáneo, pero nos mester siña konfi’E sin importá nada.

Pues, e tópiko pa e siman akí: Moises i e mandato pa saka e pueblo di Dios for di Egipto, un yamada asina kla di Dios ku kualke hende por tabatin. Enbèrdat, e tabata inkluí milagernan, komo tambe Dios mes papiando direktamente ku Moises i lag’é sa eksaktamente kiko E tabata ke pa Moises hasi.

Kuantu mas fásil, antó, lo por tabata pa Moises, sabiendo ku el a ser yamá dor di Dios i asta a ser duná un tarea spesífiko?

E mester tabata simpel antó, no? Sigui lesa.

Ken Señor Ta?

Siguiendo e òrdunan di Dios, Moises ta bai serka Fárao pa kuminsá e proseso den kua e, Moises, lo a “saka Mi pueblo, e yunan di Israel, for di Egipto” (Eks. 3:10, NKJV).

Kiko tabata e kontesta di Fárao riba e demanda di Dios: “Laga mi pueblo bai” (lesa Eks. 5:1,2), i ki nifikashon por ser hañá den e kontesta akí?

“Ken ta SEÑOR?” Fárao ta deklará, no ku ningun deseo pa konos’E sino, en kambio, komo un akto di desafio òf asta nengamentu di e Dios akí, kende e ta atmití ku e no konosé. “Mi no konosé Señor” (NKJV), e ta bisa, kasi komo un gabamentu.

Kuantu hende atraves di historia a pronunsiá e mesun kos? Ki trágiko, pasobra, manera Hesus mes a bisa: “I esaki ta bida eterno, ku nan por konoséBo, e úniko Dios berdadero, i Hesu-Kistu, Kende Bo a manda” (Juan 17:3).

Egipto, ku e Fárao komo rei, ta simbóliko di un poder ku ta nenga e presensia i outoridat di Dios. E ta un entidat ku ta para den oposishon ku Dios, Su Palabra, i Su pueblo.

E siguiente deklarashon di Fárao ku “Lo mi no laga Israel bai” ta revelá mas ainda e rebelion akí kontra e Dios bibu, hasiendo Egipto ainda mas un símbolo, no solamente pa e nengamentu di Dios sino pa un sistema ku ta bringa kontra djE.

No ta nada straño ku hopi hende a mira e mesun aktitut akí, milenionan despues, den e Revolushon Franses (lesa tambe Isa. 30:1–3 i Rev. 11:8). Fárao a pensa ku e tabata un dios òf yu di un dios, un referensia amplio na un kreensia den un hende su mes poder, forsa i inteligensia supremo.

“Di tur nashon presentá den historia di Beibel, Egipto a nenga ku mas kurashi e eksistensia di e Dios bibu i a resistí Su mandatonan. Ningun monarka a yega di riska di tin un rebelion mas habrí i arbitrario kontra e outoridat di Shelu ku e rei di Egipto. Ora e mensahe a ser tresé p’e dor di Moises, den nòmber di Señor, Fárao a kontestá ku orguyo: ‘Ken ta Yehova, ku mi mester skucha Su bos pa laga Israel bai? Mi no konosé Yehova, i ademas lo mi no laga Israel bai,’ Eksodo 5:2, A.R.V. Esaki ta ateismo, i e nashon representá dor di Egipto lo a duna bos na un nengamentu similar di e pretenshonnan di e Dios bibu i lo a manifestá un spiritu similar di inkredulidat i desafio.”—Ellen G. White, The Great Controversy, p. 269.

Si un hende a puntra: Bo konosé Señor? Kon lo bo a kontestá? Si ta sí, kon lo bo a bisa ku E ta, i dikon?

Un Komienso Difísil

Aunke Moises mester tabata sa, asta for di prinsipio, ku loke Señor a enkarg’é no tabata bai ta fásil (p’esei su intentonan pa sali for di dje), probablemente e no tabatin niun idea di kiko tabata bini.

Lesa Eksodo 5:3–23. Kiko tabata e resultadonan inmediato di Moises i Aaron su promé enkuentro registrá ku Fárao?

Asta promé ku nan a bai serka Fárao, Moises i Aaron a reuní e ansianonan i pueblo di Israel, a bisa nan e palabranan di Dios, i a mustra nan e señalnan di Dios, loke a resultá den e kreensia di Israel ku Señor lo a libra nan for di nan sklabitut. Pues, nan a adorá Señor (Eks. 4:29–31). Ekspektativanan siguramente tabata haltu: Señor tabata bai libra e pueblo hebreo for di nan sklabitut, por fin!

Despues Moises a bai serka e rei di Egipto ku e demandanan di Dios, i kosnan a bira pió ainda pa e israelitanan. Nan sufrimentu a oumentá, i nan trabou diario a bira mas pisá i eksigente. Nan a ser akusá di ta floho; nan a ser tratá mas duru; i nan servisio a bira mas difísil ku e tabata kaba.

Nan lidernan no tabata kontentu, i e konfrontashon entre nan i Moises i Aaron tabata mahos, i (manera nos lo mira despues) e tabata simplemente anunsiá adelantá e tipo di konfliktonan ku Moises lo tabatin ku su mes pueblo pa añanan benidero.

Lesa Eksodo 5:21, i despues pone bo mes na lugá di e hòmbernan akí ora nan a konfrontá Moises i Aaron. Dikon nan lo a bisa loke nan a bisa?

No ta asina difísil pa mira dikon nan lo tabata rabiá ku Moises (“Laga SEÑOR wak bo i husga,” nan a bisa). Nan a kere ku Moises tabata bini pa libra nan for di e egipsionan, no pa hasi nan bida bou di e egipsionan mas difífil ainda.

Pues, ademas di atendé ku e egipsionan, Moises i Aaron mester a atendé ku nan mes pueblo tambe.

E “AMI” Divino

Pober Moises! Promé e ta ser reprochá dor di Fárao, i awor su mes pueblo ta kasi maldishon’é.

Asina, Moises ta trese su keho serka Dios. Den su amargura i desepshon ku e kondishonnan di Israel ku ta empeorá, e ta puntra: “Pakiko, Señor, dikon Bo a trese problema riba e pueblo akí? Ta pa esaki Bo a mandami? Desde ku mi a bai serka Fárao pa papia den Bo nòmber, el a trese problema riba e pueblo akí, i Bo no a reskatá Bo pueblo en apsoluto” (Eks. 5:23, NIV). Moises su malkontentu ku Señor ta opvio i, konsiderando e situashon, komprendibel.

Dios su kontesta, sinembargo, ta poderoso. E lo aktua, i masha desisivo, tambe. “Awor lo bo mira kiko lo Mi hasi ku Fárao” (Eks. 6:1, NIV).

Lesa Eksodo 5:22–6:8. Kiko ta Dios su kontesta na Moises, i ki bèrdatnan teológiko importante ta ser revelá aki?

Dios lo no papia so mas; E lo intervení awor poderosamente na fabor di Su pueblo. E ta kòrda Moises riba algun echo pertinente:

1. “Ami ta SEÑOR”;
2. Ami a aparesé na e patriarkanan;
3. Ami a establesé Mi aliansa ku nan;
4. Ami a primintí di duna nan e tera di Canaan;
5. Ami a tende e kehamentu di e yunan di Israel; i
6. Ami a kòrda riba Mi pakto pa duna boso e Tera Primintí.

Tuma nota di e ripitishon di e “Ami” divino. Ami, “SEÑOR boso Dios,” Ami a hasi tal i tal, i asina boso por konfia ku Ami lo hasi pa boso loke Ami a primintí.

Señor awor ta proklamá solemnemente ku E lo hasi kuater kos grandi pa Israel pasobra E ta nan Señor bibu:

1. “Lo Mi saka boso for di bou di e yugo di e egipsionan;”
2. “Lo Mi libra boso di ta katibu di nan;”
3. “Lo Mi redimí boso ku un brasa ekstendé i ku aktonan poderoso di huisio” i
4. “Lo Mi tuma boso komo mi mes pueblo, i lo Mi ta boso Dios” (Eks. 6:6,7, NIV).

E kuater akshonnan divino akí ta sigurá i restablesé Su relashon ku Su pueblo. Dios ta e tema di tur e aktividatnan akí, i e israelitanan ta e resipientenan di tur e benefisionan i grasia akí. Dios ta ofresé e regalonan akí grátis, pa motibu di amor; El a hasié e tempu ei, na nan, i E ta hasié awor, pa nos, tambe.

Lepnan Insirkunsidá

Señor enbèrdat a duna Moises algun promesa poderoso tokante kiko E tabata bai hasi. Aunke e enkuentro ei mester a animá Moises, su enkurashamentu probablemente tabata di durashon kòrtiku, mirando e reakshon ku el a risibí di su pueblo.

Lesa Eksodo 6:9–13. Kiko a pasa despues, i ki lèsnan nos por saka for di e storia akí tokante momentunan di desepshon i lucha den nos bida?

E hebreonan ta asina desanimá pa motibu di nan tristesa, sufrimentu i trabou duru ku nan no ta skucha Moises su palabranan di trankilidat ku Dios lo aktua pa kumpli ku loke El a primintí. Nan a warda asina tantu riba dje, i nan ekspektativanan no a ser kumplí. Dikon e mester ta diferente awor? Nan tabata pèrdè kurashi i speransa, loke mester tabata asta mas amargo pasobra, kisas pa promé biaha den henter nan bida, nan a mira berdadero speransa di liberashon. I tòg, ken no a yega di ta na un lugá similar? Ken no a yega di sinti su mes deprimí, desepshoná, malkontentu, asta bandoná pa Dios?

Bo ta kòrda e storia di Job? Ke tal di Asaf, un salmista ku a lucha ku su preguntanan relashoná ku e prosperidat di e malbadonan i e sufrimentu di e hustunan? Sinembargo, sin importá su luchanan, Asaf tin un di e konfeshonnan di fe di mas bunita: “Sinembargo, mi ta semper serka Bo; Bo ta tenemi na mi man drechi. Bo ta guiami ku Bo konseho, i despues lo Bo hibami den gloria. Ken mi tin den shelu sino Abo? I tera no tin nada ku mi ta deseá fuera di Bo. Mi karni i mi kurason por faya, ma Dios ta e fortalesa di mi kurason i mi porshon pa semper” (Salmo 73:23–26, NIV).

Atraves di historia sagrado, Dios a sigurá Su pueblo ku E ta ku nan (Isa. 41:13, Mat. 28:20). E ta duna nan Su pas, Su konsuelo, i E ta fortalesé nan pa pasa dor di e desafionan di bida (Juan 14:27; Juan 16:33; Fil. 4:6,7).

E fórmula di e pakto, “ ‘Lo Mi tuma boso komo Mi pueblo, i lo Mi ta boso Dios” (Eks. 6:7, NKJV), ta ekspresá e relashon íntimo ku Señor tabata ke tin ku Su pueblo.

Manera Dios pa Fárao

Lesa Eksodo 6:28–7:7. Kon Señor ta atendé ku e opheshon di Moises?

Dios ta presentá Su mes na Moises komo Yahweh, loke ta nifiká ku E ta e Dios personal i serka, e Dios di Su pueblo, i e Dios ku a drenta un relashon di pakto ku nan.

E Dios inmanente akí ta manda Moises atrobe pa bai papia ku Fárao. Ku un falta di konfiansa propio, Moisés ta bolbe oponé: “Pakiko Fárao lo a skuchami?” Aki atrobe nos por mira no solamente e humildat di Moises sino, atrobe, su deseo pa sali for di e tarea, ku te awor no a bai muchu bon.

“Ora Dios a ordená Moises pa bai bèk serka Fárao, Moises a mustra deskonfiansa propio. E término ‘aral sepatayim, literalmente ‘lepnan insirkunsidá,’ ku ta ser usá aki pa ekspresá Moises su falta di abilidat di papia (6:12, 30), ta similar na esun hañá den Eksodo 4:10: ‘ta papia ku difikultat’ ” Andrews Bible Commentary: Old Testament, “Exodus” (Berrien Springs, MI: Andrews University Press, 2020), p. 205.

Dios den Su mizerikòrdia ta duna Aaron pa yuda Moises. Moises lo papia ku Aaron, ku despues lo papia públikamente ku Fárao; pues, Moisés lo hunga e ròl di Dios dilanti di e rei egipsio, i Aaron lo ta su profeta. E relato akí ta proveé un definishon ekselente pa e ròl di un profeta.

Un profeta ta un bosero pa Dios; e ta Su bosero pa transmití i interpretá e palabra di Dios na e pueblo. Manera Moises a papia ku Aaron, i despues Aaron a anunsiá esaki na Fárao, asina Dios ta komuniká ku un profeta, ku despues ta proklamá e siñansa di Dios na e pueblo. Esaki por sosodé verbalmente, personalmente; òf, manera tabata ser hasí mas komunmente, e profeta tabata risibí e mensahe for di Dios i despues tabata skirbié.

Tambe Dios ta splika Moises kiko e por spera di e enkuentronan ku Fárao. E ta spièrt’é ku e konfrontashon lo ta tenso i largo. Pa di dos biaha Dios ta enfatisá na Moises ku Fárao lo ta hopi tèrko i ku E lo hasi su kurason duru (Eks. 4:21, Eks. 7:3). E resultado, sinembargo, lo kaba den algu bon, pasobra “e egipsionan lo sa ku Ami ta SEÑOR” (Eks. 7:5, NIV). Es desir, asta meimei di e káos ku ta sigui, Dios lo ser glorifiká.

Lesa Ellen G. White, “The Plagues of Egypt,” p. 257–265, den Patriarchs and Prophets.

Wak kon malu kosnan a kuminsá pa Moises i su pueblo despues ku Moises a aserká Fárao pa promé biaha.

“E rei, kompletamente lantá, a sospechá e israelitanan di un plan pa rebeldiá for di su sirbishi. Desafekto tabata resultado di falta di aktividat; e lo a mira ku no a sobra tempu pa hasi intriganan peligroso. I mesora el a adoptá medidanan pa sera nan lasonan mas i aplastá nan spiritu independiente. E mesun dia ei òrdunan a ser emití, ku a hasi nan trabou mas kruel i opresivo ainda. E material di konstrukshon di mas komun di e pais ei tabata blòki seká den solo; e murayanan di e edifisionan di mas bunita tabata trahá di esaki, i despues furá ku piedra; i e fabrikashon di blòki a empleá gran kantidat di katibu. Yerba seku kòrtá siendo mesklá ku e klei, pa tene esaki huntu, kantidatnan grandi di yerba seku tabata ser rekerí pa e trabou; awor e rei a ordená pa no proveé mas yerba seku; e trahadónan mester busk’é pa nan mes, miéntras ku e mesun kantidat di klenku mester ser eksigí.

“E òrdu akí a produsí gran angustia meimei di e israelitanan den henter e tera. E kapatasnan egipsio a nombra ofisialnan hebreo pa supervisá e trabou di e pueblo, i e ofisialnan akí tabata responsabel pa e trabou ku esnan bou di nan enkargo tabata hasi. Ora e rekerimentu di e rei a ser poné na vigor, e pueblo a plama nan mes den henter e tera, pa rekohé bagás en bes di yerba seku; pero nan a haña imposibel pa kumpli ku e kantidat usual di labor. Pa e frakaso akí e ofisialnan hebreo a ser batí kruelmente.”—Ellen G. White, Patriarchs and Prophets, p. 258.

Preguntanan pa Diskushon: