E Pan i Awa di Bida

Lesa pa e Estudio di e Siman Akí:

Versíkulo di Memoria:

“I SEÑOR a bisa Moises: ‘Kuantu tempu mas boso ta nenga di warda Mi mandamentunan i Mi leinan?’ Mira! Pasobra SEÑOR a duna boso e Sabat; p’esei E ta duna boso pan pa dos dia riba e di seis dia. Laga kada hende keda na su lugá; no laga ningun hende sali for di su lugá riba e di shete dia. Asina e pueblo a sosegá riba e di shete dia” (Eksodo 16:28–30, NKJV).

Despues di a bandoná Egipto, Israel tabata riba un biahe deskonosí pa e Tera Primintí. E hendenan a enfrentá un kaminata eksigente i largu, i nan mester a siña un multitut di lèsnan nobo. Señor lo a guia i kuida nan; i, sí, E tabata deseá di yuda nan krese, pero nan mester siña disiplina, dominio propio, sakrifisio, apnegashon, konfiansa den Señor, i spesialmente obediensia.

Moises tabata un lider visibel, i e pueblo mester a siguié i su liderazgo si nan ker a triunfá. Tabata krusial pa nan keda huntu, koperá komo un komunidat, i asistí otro. Tabatin hopi opstákulo i desafio nan dilanti. Asina tantu di nan kresementu spiritual lo a dependé riba kon nan a enfrentá e desafionannan ei i kon nan a reakshoná riba Moises, spesialmente ora e desafionan a bira grandi.

E dicho chines konosí ku ta bisa ku “un biahe di mil mia ta kuminsá ku un solo paso” tabata bèrdat den nan situashon, i nan mester a konfia e direkshonnan di Señor ku kada paso. Trágikamente, manera nos lo mira, nan no a siña e lèsnan ei asina fásil.

Pero e ora ei atrobe, ken ta hasié?

Awanan Marga

Den narativonan bíbliko, diferente ròl ta ser hungá dor di diferente personahe, bon òf malu, i nos mester paga bon atenshon na e kòmplòtnan, lugánan, tempu i bandidunan. Sinembargo, e punto di mas importante den un liña di storia ta generalmente e solushon i e lèsnan siñá. No ta diferente den e relatonan akí.

Manera e episodionan ta mustra, Dios ta e Solushonadó di Problema i e Hasidó di Pas; sinembargo, Su trabou ta ser kompliká dor di e inkredulidat di hende. Komo resultado di nan murmuramentu i desobedensia konstante, e hebreonan a eksperensiá komplikashonnan serio, asta tragedianan. Nan a trese riba nan mes hopi difikultat pa motibu di nan inkredulidat i falta di arepentimentu.

Lesa Eksodo 15:22-27. Despues di a krusa Laman Kòrá, kiko tabata e trasfondo di e promé milager realisá?

E promé prueba di Israel su fe ta asosiá ku e nesesidat pa awa, no sorprendente mirando e ambiente duru, kayente i seku di desierto. Despues di tres dia di biahe, e hendenan porfin a haña awa, pero e tabata imbebibel. Marah ta nifiká “marga,” i pa motibu ku e awa tabata marga, Israel su fe den nan Señor kuidadoso a tambaliá rápidamente. Sinembargo, Dios a reakshoná ku kompashon, i e promé milager a ser realisá ku un pida palu. Naturalmente, no tabata e palu sino Señor a hasi e awa dushi i bebibel. E pueblo mester a siña lèsnan importante:

1. pasenshi pa warda riba e tempu di Señor, i
2. ku Dios ta hasi kosnan den koperashon ku hende.

Sinembargo, e yunan di Israel a tuma asina tantu kos pa normal i rápidamente a lubidá e milagernan grandi ku Dios a hasi pa nan, milagernan pa kua nan a kaba di kanta alabansa na djE ku asina tantu pashon, deklarando: “Ken ta manera Bo, o SEÑOR, entre e diosnan? Ken ta manera Bo, mahestuoso den santidat, impreshonante den echonan glorioso, obrando maravianan?” (Eks. 15:11, ESV).

I sinembargo, asta despues di nan kehamentu, Dios a primintí ku E lo no a trese riba e israelitanan “ningun di e enfermedatnan” (Eks. 15:26, NIV) ku a asotá e egipsionan. E lo a protehá nan. Nan por a eksperensiá e promesa akí solamente riba e kondishon ku nan lo a keda fiel na djE.

Ki prueba- i luchanan bo a trese riba bo mes? Ki konsuelo bo por haña dor di sa ku Dios lo sigui obra na bo fabor si bo koperá kunE?

Patrushi i Mana

Desafortunadamente, tin un patronchi ripití di rebelion den e storianan di peregrinashon akí. E hendenan tabata notoriamente distraí ku e man poderoso di Dios a yuda nan den pasado i ku El a proveé solushonnan pa nan problemanan. Nan a laga nan problemanan aktual siega nan dilanti di nan meta final i nan futuro maravioso primintí. E ta un problema komun asta bou di e pueblo di Dios awe tambe.

Lesa Eksodo 16:1-36. Kiko tabata e kousa di e murmuramentu di e israelitanan, i kiko a sigui?

Ta importante pa tuma nota ku tentashonnan den Beibel hopi bes ta relashoná ku kuminda. Den e Hòfi di Eden, e Kaida tabata relashoná ku kome for di e palu prohibí di konosementu di bon i malu (Gen. 2:16,17; Gen. 3:1–6). Den e tentashonnan di Hesus den desierto, Satanas su promé tiru riba djE tabata pa medio di kuminda (Mat. 4:3). Esau a pèrdè su derechonan di primogénito pa motibu di su apetit indisipliná (Gen. 25:29–34). Kuantu biaha e desobedensia di Israel tabata konektá ku kuminda i bebida! No ta nada straño ku Moises a rekordá e generashonnan despues:

“Hende no ta biba pa medio di pan so, ma hende ta biba pa medio di kada palabra ku ta sali for di boka di SEÑOR” (Deut. 8:3, ESV).

Mana, naturalmente, tabata un pan selestial ku Dios a supli e israelitanan kuné durante nan 40 aña di estadia den desierto. Pa medio di e regalo akí, El a siña nan ku E ta e Kreador i e Proveedor di tur kos. Tambe, Dios a usa Su provishon sobrenatural di mana pa mustra nan kon warda e Sabat di e di shete dia.

Tur siman kuater milager a tuma lugá:

1. pa seis dia, Dios a duna un porshon diario di mana;
2. riba djabièrnè, un dòbel porshon di mana tabata ser duná;
3. e mana no tabata daña di djabièrnè pa Sabat;
4. mana no tabata kai riba Sabat.

Dios tabata realisá e milagernan akí konstantemente pa e pueblo por a kòrda e dia di Sabat i selebrá e bondat di Dios riba e dia ei. Dios a bisa: “Tene na mente ku SEÑOR a duna boso e Sabat” (Eks. 16:29, NIV).

Awa For di e Baranka

Den desierto bo mester di hopi awa. Dios a pèrkurá pa e problema akí, ounke e hendenan tabata pleitadó, no tabata konfi’E, i asta a pone Su abilidat i boluntat pa duna nan awa, na prueba. Den nan inkredulidat, nan a wak bèk na Egipto.

Lesa Eksodo 17:1-7. Ki lès e pueblo mester a siña for di e insidente akí?

Moises a yama e lugá Massah, ku ta nifiká “prueba,” i Meriba, ku ta nifiká “pleitu.” Señor a duna e israelitanan awa apesar di nan inkredulidat. E dos nòmbernan akí mester a rekordá e israelitanan pa no pone Dios na prueba i pa no pleita kunE (Hebr. 3:7,8,15). Nan a kuestioná seriamente e presensia di Dios meimei di nan, ounke nan a mira hopi evidensia tangibel kaba di no solamente Su presensia sino di Su poder i Su outoridat.

“Moises a dal e baranka, pero tabata e Yu di Dios kende, tapá den e pilá di nubia, tabata para banda di Moises, i a laga e awa, ku ta duna bida, kore. No solamente Moises i e ansianonan, sino henter e kongregashon ku tabata para na un distansia, a kontemplá e gloria di SEÑOR; pero si e nubia a ser kitá, nan lo a ser matá dor di e brio teribel di Esun ku tabata permanesé den dje.”—Ellen G. White, Patriarchs and Prophets, p. 298.

Awa ta un símbolo di bida pasobra sin awa no tin bida. Kada sèl den nos kurpa mester di awa. Nos mes ta konsistí 60 porshento di awa. Asta nos wesunan ta komponé parsialmente di awa. Pues, proveé awa den desierto pa nan tabata un señal pa e israelitanan ku Dios tabata pèrkurá pa nan nesesidatnan i ku nan por a konfi’E. Pero, atrobe, nan mester a obedesé. Hopi siglo despues, Pablo, den 1 Korintionan 10:4, ta rekordá kreyentenan ku e eksperensia di e israelitanan den desierto tabata úniko. Kristu Mes no solamente a guia nan, sino a proveé nan ku awa (Salmo 78:15,16) i a kumpli ku otro nesesidatnan spiritual i físiko. Pablo a proklamá: “E Baranka ei tabata Kristu.” Pa nan, Kristu tabata e Fuente di bida i e Dunadó di bida eterno. Meskos ku un baranka ta sólido, asina Dios a guia Su pueblo firmemente. Hende por konta kunE pasobra E no ta keda sin kumpli ku Su promesanan.

Jethro

Jethro, su suegro, a bishitá Moises, kende tambe ta ser yamá Reuel (Eks. 2:18). Jethro a trese kuné Moises su kasá, Zipporah, i dos yu hòmber, Gershom i Eliezer. Ora Moises a tende ku nan tabata bini, el a sali bai pa risibí nan.

Lesa Eksodo 18:1–27. Ki pasonan grandi den historia di e nashon a tuma lugá aki?

Jethro a bin pasobra el a tende di e liberashon asombroso ku Dios a hasi pa Israel. Moises a konta Jethro den detaye “tur loke SEÑOR a hasi ku Fárao i e egipsionan pa motibu di Israel i tokante tur e difikultatnan ku nan a topa na kaminda i kon SEÑOR a salba nan” >(Eks. 18:8, NIV).

Jethro a alabá Dios su bondat i intervenshonnan ekstraordinario na nòmber di Su pueblo, deklarando:

“Bendishoná sea SEÑOR, kende a libra boso for di man di e egipsionan i for di man di Fárao i a libra e pueblo for di bou di man di e egipsionan. Awor mi sa ku SEÑOR ta mas grandi ku tur dios, pasobra den e asuntu akí nan a trata e pueblo ku arogansia” (Eks. 18:10,11, ESV).

Loke nos ta mira aki ta un ehèmpel di kon e obra di Dios, meimei di Su pueblo, mester tabata un testimonio pa mundu di ken e Dios berdadero ta i di loke E por hasi pa Su pueblo.

Na mes momentu ku Jethro a siña tokante e Dios berdadero, e mes tabatin algu pa ofresé e pueblo di Dios: konseho sabí i benefisioso. Moises mester a organisá e sistema hurídiko ku prinsipionan hustu i honesto. Tambe e tabatin mester di huesnan dediká i fiel, hòmbernan di integridat. Sabiamente Jethro a enumerá e siguiente kualifikashonnan:

1. hòmbernan ku ta teme Dios;
2. hòmbernan ku ta digno di konfiansa; i
3. hòmbernan ku ta odia ganashi deshonesto.

Hendenan kapas di bon karakter mester a ser nombrá riba diferente unidat di míles, sentenares, sinkuenta i desenanan. Di e manera akí, Moises su karga atministrativo lo a ser redusí, i e por a enfoká riba problemanan signifikante. Asina, e pueblo lo tabata bon sirbí.

Moises a aseptá e konseho sabí di Jethro (Eks. 18:24) i a nombra lidernan pa diferente ròlnan atministrativo (lesa tambe Deut. 1:9–18).

E Pan i Awa di Bida

Lesa 1 Korintionan 10:11. Ki motibu Pablo ta duna pa e susesonan akí a ser registrá?

Pablo ta splika ku tur e kosnan ku a pasa ku e israelitanan ta ehèmpel i spièrtamentu pa e siguidónan di Kristu i lo yuda nan evitá e mesun problemanan; es desir, nan lo siña di e ehèmpelnan akí. Esaki ta instrukshon pertinente pa nos, nos ku ta biba na “fin di e siglonan” (ESV). Dios ta duna Su pueblo e Spiritu Santu pa fortalesé e kreyentenan ku “poder, amor i disiplina propio” (2 Tim. 1:7, NIV) pa asina nan por tuma desishonnan korekto i sigui Su siñansa. Hesu-Kristu ta e Fuente di bida nobo (Juan 14:6), i solamente E por kombertí nos den “un sakrifisio bibu, santu i aseptabel pa Dios. ... No sea konformá ku e mundu akí, ma sea transformá dor di e renobashon di boso mente, pa dor di prueba boso por diserní kiko ta e boluntat di Dios, kiko ta bon i aseptabel i perfekto” (Rom 12:1,2, ESV).

Mas despues, den Su ministerio, Hesus a usa lèsnan for di e relatonan akí di Tèstamènt Bieu, partikularmente ku e mana i e awa, usando e imágennan ei pa siña bèrdatnan tokante Su mes, Esun ku a guia e israelitanan dor di e desierto.

Lesa Juan 4:7–15 i Juan 6:31–51. Ki bèrdatnan ta ser revelá aki pa nos komo kristiannan?

E muhé samaritano a deskubrí ku Kristu ta ofresé algu ku e lo no a haña ningun otro kaminda. E set interno pa pas, goso i felisidat ta bini di Dios, i pues ta Dios so por satisfasé esaki (Salmo 42:1,2).

Mas despues, den e konteksto di e mana, Hesus a splika ku tabata Dios, no Moises, kende a proveé esaki pa e pueblo. E ora ei Hesus a deklará: “Ami ta e pan di bida; ken ku bini serka Mi lo no tin hamber” (Juan 6:35, ESV). Hesus a ripití dos biaha ku E ta e Pan di Bida (Juan 6:35,41,48).

Meskos ku e mana den desierto tabata “pan for di shelu” (Juan 6:31,32), asina e awa for di e baranka tabata e regalo di Kristu pa satisfasé nan set. Ademas di e aspektonan físiko akí, pan i awa tabatin nifikashon spiritual tambe, pasobra Hesu-Kristu ta “e pan di bida” (Juan 6:35,48) i “e awa bibu” (Juan 4:10,11,14; Juan 7:37,38). Solamente den djE, antó, nos set i hamber spiritual berdaderamente por ser satisfasé.

Lesa Ellen G. White, “From the Red Sea to Sinai,” p. 291–302, den Patriarchs and Prophets.

No muchu tempu despues di e insidente ku e awa, e nashon a enfrentá un peliger nobo (lesa Eks. 17:8–16 ): un tribu feros i militante, e amalekitanan, a ataká nan. “E amalekitanan no tabata ignorante di e karakter di Dios òf di Su soberania, pero en bes di teme dilanti di djE, nan a proponé nan mes pa desafiá Su poder. E maravianan, hasí dor di Moises dilanti di e egipsionan, a ser hasí un tema di burla dor di e pueblo di Amalek, i e miedu di e nashonnan alrededor a ser ridikulisá. Nan a hura pa nan diosnan ku nan lo a destruí e hebreonan, pa asina niun lo no a skapa, i nan a gaba ku e Dios di Israel lo tabata impotente pa resistí nan. Nan no a ser heridá òf menasá dor di e israelitanan. Nan asalto tabata totalmente no provoká. Tabata pa manifestá nan odio i desafio kontra Dios ku nan a buska pa destruí Su pueblo. E amalekitanan tabata pekadornan arogante pa hopi tempu, i nan krímennan tabata sklama na Dios pa vengansa, sinembargo, Su mizerikòrdia ainda a yama nan na arepentimentu; pero ora e hòmbernan di Amalek a kai riba e filanan kansá i indefenso di Israel, nan a seya e destino di nan nashon.”—Ellen G. White, Patriarchs and Prophets, p. 300.

Preguntanan pa Diskushon: