E Plaganan

Lesa pa e Estudio di e Siman Akí:

Versíkulo di Memoria:

“Asina Fárao su kurason tabata duru; ni tampoko el a laga e yunan di Israel bai, manera SEÑOR a papia pa medio di Moises” (Eksodo 9:35, NKJV).

Un kunukero tabata purba pone su buriku move; e bestia no tabata move. Asina, e kunukero a kue un rama diki i a dal e. El a bolbe papia ku e buriku, ku despues a kuminsá move.

Ora un hende a puntra e kunukero dikon esei a funshoná, el a kontestá: “Bon, promé bo mester haña su atenshon.”

Poniendo un banda kualke asuntu ku un hende lo por lanta tokante krueldat kontra bestia, tin un punto destaká aki, spesialmente den konteksto di e Eksodo di e hebreonan for di Egipto. Moises a haña su òrdunan di marcha i ta bai serka Fárao ku e palabranan famoso di Dios, shalach et ami, ku ta, “Laga Mi pueblo bai!”

Fárao, sinembargo, no ke laga e pueblo di Dios bai. Skritura nunka ta splika eksplísitamente dikon Fárao tabata asina reservá, apesar di e menasa militar ku e egipsionan tabatin miedu ku e hebreonan por a forma(lesa Eks. 1:10). Probablemente, manera hopi biaha ta e kaso ku sklabitut, e tabata puru ekonómiko. Nan tabata labor barata, i pues e no ker a pèrdè kualke bentaha ekonómiko ku e katibunan akí tabata dun’é. Pues, e tabata bai tin mester di algun persuashon, no solamente pa haña su atenshon, sino tambe pa kambia su opinion.

Dios vs. diosnan

Lesa Eksodo 7:8–15. Ki lèsnan tin den e promé konfrontashon akí entre e Dios di e hebreonan i e diosnan di Egipto?

E batayanan benidero tabata bai ta entre e Dios bibu i e “diosnan” egipsio. Loke a hasi kosnan pió tabata ku Fárao tabata konsiderá su mes komo un di e diosnan ei. Señor no a bringa kontra e egipsionan, ni sikiera Egipto en sí, sino kontra nan deidatnan (e egipsionan tabata venerá mas ku 1.500 dios i diosa). E teksto bíbliko ta eksplísito: “Riba tur e diosnan di Egipto lo mi ehekutá huisionan: Ami ta Señor” (Eks. 12:12, ESV). Despues, e ta ser enfatisá un biaha mas, e biaha akí ora ku e biahe di Israel for di Egipto a ser kontá: “Señor a trese huisio riba nan diosnan” (Num. 33:4, NIV).

Un ehèmpel di e huisio akí riba nan diosnan a ser bon demostrá pa medio di e milager di e bara ku a bira un kolebra (Eks. 7:9–12). Na Egipto, e diosa di Uraeus Wadjet a ser personifiká pa un kobra i tabata representá poder soberano riba Egipto abou. E símbolo di un kobra tabata aparesé den e korona di Fárao, un señal di su poder, deidat, realesa i outoridat divino, pasobra e diosa akí tabata skupi venenu riba e enemigunan di Fárao. E egipsionan tambe tabata kere ku e kolebra sagrado lo a guia e Fárao pa su bida despues di morto.

Ora ku e bara di Aaron a bira un kolebra i a kome tur e otro kolebranan dilanti di e rei, e supremasia di e Dios bibu riba magia i bruheria egipsio a keda manifestá. No solamente e emblema di e poder di Fárao a ser konkistá, sino Aaron i Moises a ten’é den nan man (Eks. 7:12,15). E konfrontashon inisial a demostrá e poder i dominio di Dios riba Egipto. Moises, komo representante di Dios, tabatin mas outoridat i poder ku e “dios” Fárao mes.

Ta signifikante tambe ku e egipsionan antiguo tabata konsiderá un dios di kolebra, Nehebkau (“esun ku ta sòru pa e spiritunan”), komo sagrado, adorá i venerá. Segun nan mitologia, e dios kolebra akí tabatin gran poder pasobra el a guli shete kobra. Pues, Dios a komuniká na e egipsionan ku E, no e dios kolebra, tin poder i outoridat soberano. Despues di un konfrontashon asina poderoso, nan por a komprondé e mensahe akí mesora i klaramente.

Kon nos por permití Señor tin soberania riba kualke un di e “diosnan” ku ta buska supremasia den nos bida?

Ken a Hasi Kurason di Fárao duru?

Lesa Eksodo 7:3,13,14,22. Kon nos ta komprondé e tekstonan akí?

Nuebe biaha den Eksodo e enduresementu di kurason di Fárao ta ser atribuí na Dios (Eks. 4:21; Eks 7:3; Eks 9:12; Eks 10:1,20,27; Eks 11:10; Eks 14:4,8; lesa tambe Rom. 9:17,19). Un otro nuebe biaha ta ser bisá ku Fárao a hasi su mes kurason duru (Eks. 7:13,14,22; Eks. 8:15,19,32; Eks. 9:7,34,35).

Ken a hasi e rei su kurason duru, Dios, òf Fárao mes?

Ta signifikante ku den e storia di Eksodo di e dies plaganan, den kada un di e promé sinku plaganan, Fárao so tabata e agente di su kurason ku a bira duru. Pues, el a inisiá e enduresementu di su mes kurason. For di e di seis plaga padilanti, sinembargo, e teksto bíbliko ta deklará ku tabata Dios kende a hasi Fárao su kurason duru (Eks. 9:12). Loke tur esaki ta nifiká ta ku Dios a fortalesé òf profundisá Fárao su propio eskoho, su akshon boluntario, manera Dios a bisa Moises ku E lo a hasi (Eks. 4:21) .

Ku otro palabra, Dios a manda plaga pa yuda Fárao arepentí i pa libr’é for di e skuridat i eror di su mente. Dios no a krea maldat fresku den kurason di Fárao; en kambio, El a simplemente entregá Fárao na su mes impulsonan maligno. El a lag’é sin e grasia di restrikshon di Dios i pues a entreg’é na su propio maldat (lesa Rom. 1:24–32).

Fárao tabatin su boluntat liber, e por a skohe pa, òf kontra di Dios, i el a disidí kontra.

E lèsnan ta opvio. Nos a ser duná e abilidat pa skohe entre korekto i robes, bon i malu, obediensia òf desobedensia. For di Lucifer den shelu, te na Adam i Eva den Eden, te na Fárao na Egipto, i te na nos awe, unda ku nos ta biba, nos ta skohe sea bida òf morto (Deut. 30:19).

Un analogia: imaginá solo ku ta bati riba manteka i klei. Manteka ta dirti pero klei ta bira duru. E kalor di solo ta e mesun den tur dos kaso, pero tin dos diferente reakshon na e kalor, i dos diferente resultado. E efekto ta dependé di e material. Den kaso di Fárao, hende por bisa ku e tabata dependé di e aktitutnan di su kurason pa ku Dios i Su pueblo.

E Promé Tres Plaganan

E dies plaganan na Egipto no tabata dirigí riba e pueblo egipsio sino riba nan diosnan. Kada plaga a dal por lo ménos un di nan.

Lesa Eksodo 7:14–8:19. Kiko a pasa den e plaganan akí?

Dios a instruí Moises ku e diálogo ku Fárao lo tabata difísil i kasi imposibel (Eks. 7:14). Sinembargo, Dios ker a revelá Su mes na Fárao i na e egipsionan. Pues, El a disidí di komuniká ku nan na un manera ku nan por a komprondé. Tambe, e hebreonan lo a benefisiá di e konfrontashon akí pasobra nan lo a siña mas tokante nan Dios.

E promé plaga tabata dirigí kontra Hapi, e dios di Nilo (Eks. 7:17–25). Bida na Egipto tabata totalmente dependiente di awa for di Nilo. Kaminda tabatin awa, tabatin bida. Awa tabata e fuente di bida, asina ku nan a inventá nan dios Hapi i a ador’é komo e proveedó di bida.

Naturalmente, solamente e Dios bibu ta e Fuente di bida, e Kreador di tur kos, inkluso awa i kuminda (Gen. 1:1,2,20–22; Salmo 104:27,28; Salmo 136:25; Juan 11:25; Juan 14:6). Kambiando awa den sanger ta simbolisá transformá bida den morto. Hapi no tabata kapas pa proveé i protehá bida. Esakinan ta posibel solamente pa medio di e poder di Señor. Despues Dios ta duna Fárao un chèns mas. E biaha akí e diosa di sapu, Heqet, ta ser konfrontá direktamente (Eks. 8:1–15). En bes di bida, Nilo ta produsí sapu, ku e egipsionan ta teme, odia, i aboresé. Nan ke deshasí di nan. E momentu presis ku e plaga akí a ser kitá a demostrá ku e poder di Dios tambe tabata tras di e plaga akí.

E di tres plaga tin e deskripshon di mas kòrtiku (Eks. 8:16–19). E tipo di insekto akí (hebr. kinnim) no ta kla (sangura, muska, karpata, pieu?). E tabata dirigí kontra e dios Geb, e dios egipsio di tera. For di e stòf di tera (ekonan di e historia bíbliko di Kreashon) Dios a saka muska, ku a plama den henter e tera. Inkapas pa dupliká e milager akí (solamente Dios por krea bida), e magonan a deklará: “Esaki ta e dede di Dios” (Eks. 8:19). Fárao, sinembargo, ainda a nenga di sede.

Muska, Bestianan, i Herida

Lesa Eksodo 8:20–9:12. Kiko e relato akí ta siña tokante maske kon grandi e manifestashonnan di e poder i gloria di Dios por ta, humanidat ainda tin libertat pa rechas’E?

E dios egipsio Uatchit tabata e dios di muska i di pantano. E dios Khepri (di solo saliente, kreashon i renasementu) tabata ser representá ku kabes di un bákatòr. E “diosnan” akí a ser derotá dor di Señor. Den e relato akí (Eks. 8:20–24), miéntras e egipsionan tabata sufri, e hebreonan tabata protehá. De echo, ningun plaga mas a afektá nan.

Atrobe, tur esaki tabata un intento di Dios pa laga Fárao sa ku “Ami ta e Señor meimei di e tera” (Eks. 8:22, NKJV).

Asina, Fárao a kuminsá negoshá. Sin duda e preshon tabata oumentando. E tabata dispuesto pa Israel adorá nan Dios i sakrifiká na djE, pero solamente den e tera di Egipto (Eks. 8:25). Su kondishonnan no por a ser kumplí pasobra algun di e bestianan tabata ser konsiderá sagrado na Egipto, i sakrifiká nan lo a kousa violensia kontra e hebreonan. Tambe, esaki no tabata e plan di Dios pa Israel.

Mientrastantu, e siguiente plaga (Eks. 9:1–7) ta kai riba e bestianan. Hathor, e diosa egipsio di amor i protekshon, tabata ser representá ku kabes di un baka. Un dios toro, Apis, tambe tabata masha popular i altamente konsiderá den Egipto antiguo. Pues, den e di sinku plaga akí, deidatnan prinsipal adishonal a ser derotá ora e bestianan di e egipsionan a muri.

Den e di seis plaga (Eks. 9:8–12), e derota total di Isis, e diosa di medisina, magia i sabiduria, ta ser hasí manifesto. Tambe nos ta mira e derota di deidatnan manera Sekhmet (diosa di guera i epidemianan) i Imhotep (dios di medisina i sanashon). Nan no tabata kapas di protehá nan mes adoradónan. Irónikamente, awor asta e magonan i bruhonan ta asina afligí ku nan no por paresé den korte, loke ta mustra ku nan ta indefenso kontra e Kreador di shelu i tera.

Pa promé bes den e storia tokante e dies plaganan, un teksto ta bisa ku “Señor a hasi Farao su kurason duru” (Eks. 9:12, NIV). Maske kon konfuso e frase akí lo por ta, ora e ser komprondé den e konteksto kompletu, e ta revelá atrobe ku Señor lo laga nos kosechá e konsekuensianan di nos mes rechaso kontinuo di djE.

Hagel, Dalakochi, i Skuridat

Lesa Eksodo 9:13–10:29. Kon eksitoso e plaganan akí ta den pone Fárao kambia di idea?

Nut tabata e diosa egipsio di laira i shelunan i hopi biaha tabata ser deskribí komo kontrolando loke tabata pasa bou di shelu i riba tera. Osiris tabata e dios di kultivo i fertilidat. Den Beibel, hagel hopi bes ta ser asosiá ku e huisio di Dios (Isa. 28:2,17; Eze. 13:11–13). Durante e plaga akí, esnan ku skonde nan propiedat den un refugio sigur lo ser protehá (Eks. 9:20,21). Tur hende ta ser poné na prueba awor: nan lo, òf nan lo no, kere e Palabra di Dios i aktua di akuerdo ku esei?

Dios ta anunsiá ku Su propósito pa laga Fárao biba ta pa henter mundu konos’E (Eks. 9:16). E rei di Egipto awor ta konfesá ku el a peka, pero despues e ta kambia di idea.

E dios egipsio di tormenta, guera i desòrdu tabata ser yamá Seth. Huntu ku Isis, nan tabata ser konsiderá deidatnan di agrikultura. Shu tabata un dios di e atmósfera. Serapis tabata personifiká mahestat divino, fertilidat, sanashon i bida despues di morto. Ni un di e diosnan egipsio por a stòp e huisionan di Dios (Eks. 10:4–20) pasobra ídolonan ta nada (Isa. 44:9,10,12–17).

E sirbidónan di Fárao a urgié pa laga Israel bai, pero el a nenga atrobe. El a ofresé un kompromiso, ku korektamente Moises a rechasá pasobra hende muhé i mucha ta un parti vital i inseparabel di adorashon i e komunidat di fe.

Finalmente, Ra tabata e dios egipsio prinsipal, e dios di solo. Thoth tabata un dios di luna. Ningun di dos tabata kapas di duna lus. Fárao a bolbe purba negoshá, pero enbano. Un periodo di tres dia di skuridat a asotá Egipto, pero tabatin lus kaminda e israelitanan tabata biba. E separashon no por tabata mas espektakular.

Sinembargo, sin importá e maltrato ku su nashon a haña, Fárao tabata determiná pa bringa bèk i no entregá. Aunke nos no konosé su motibunan mas profundo, na sierto momentu e por a bira puramente un kos di orguyo. No ta importá kon poderoso e evidensia tabata, no ta importá kon opvio loke tabata pasando tabata (asta su mes sirbidónan a deklará: “Kuantu tempu mas e hòmber akí lo ta un trampa pa nos? Laga e hòmbernan bai, pa nan por sirbi SEÑOR, nan Dios. Bo no sa ainda ku Egipto a ser destruí?” [Eks. 10:7, NKJV]), i no ta importá ku e eskoho korekto tabata einan su dilanti, despues di un tiki duda, Farao ainda a nenga di someté na e boluntat di Dios i laga e pueblo bai.

Ki un ehèmpel dramátiko di e palabranan “Orguyo ta bai promé ku destrukshon, i un spiritu arogante promé ku un kaida” (Prov. 16:18, NKJV).

Lesa Ellen G. White, “The Plagues of Egypt,” p. 265–272, den Patriarchs and Prophets.

“Su [Dios su] pueblo a ser pèrmití pa eksperensiá e krueldat aplastante di e egipsionan, pa nan no por a ser engañá tokante e influensia denigrante di idolatria. Den Su trato ku Fárao, Señor a manifestá Su odio pa idolatria i Su determinashon pa kastigá krueldat i opreshon. No tabatin ehersisio di poder sobrenatural pa hasi kurason di e rei duru. Dios a duna Fárao e evidensia di mas impreshonante di poder divino, pero e monarka opstinadamente a nenga di hasi kaso di e lus. Kada demostrashon di poder infinito rechasá dor di dje, a hasié mas determiná den su rebelion. E simianan di rebelion ku el a sembra ora el a rechasá e promé milager, a produsí nan kosecha.”—Ellen G. White, Patriarchs and Prophets, p. 268.

“Solo i luna tabata ophetonan di adorashon pa e egipsionan; den e skuridat misterioso akí tantu e pueblo komo nan diosnan a ser asotá dor di e poder ku a asumí e kaso di e katibunan. Pa temibel ku e tabata, e huisio akí ta un evidensia di e kompashon di Dios i di Su falta di boluntat pa destruí. E lo a duna e pueblo tempu pa reflekshon i arepentimentu promé ku trese riba nan e último i di mas teribel di e plaganan.”— Patriarchs and Prophets, p. 272.

Preguntanan pa Diskushon: