“Por Fabor, Mustrami Bo Gloria”

Lesa pa e Estudio di e Siman Akí:

Versíkulo di Memoria:

“I SEÑOR a pasa su dilanti i a proklamá: ‘SEÑOR, SEÑOR Dios, mizerikòrdioso i yen di grasia, pasiente, i abundante den bondat i bèrdat, ku ta mantené mizerikòrdia pa míles, ku ta pordoná inikidat i transgreshon i piká, ku di nungun manera ta apsolvé e kulpabel, ku ta bishitá e inikidat di e tatanan riba e yunan i e yunan di e yunan te na e di tres i di kuater generashon’ ” (Eks. 34:6,7, NKJV).

Nos tur mester krese den nos kaminata ku Dios. Sin kresementu, nos ta morto. Apòstel Pedro ta deklará: “Ma krese den e grasia i konosementu di nos Señor i Salbador Hesu-Kristu. Na djE sea gloria tantu awor komo pa semper, Amèn” (2 Pe. 3:18, NIV). Nos mester ta dispuesto pa krese. Nos ta diariamente den e universidat di Dios, kaminda no tin graduashon sino un proseso di siñamentu konstante. Den kada etapa di kresementu, bo por ta perfekto si bo pèrmití Dios formabo den e persona ku E ta yamabo, den Kristu, pa ta.

Pensa riba un skol. Si studiantenan di promé klas siña kon lesa i konta te 100, nan ta risibí un bon nota pasobra nan konosementu ta perfekto na e nivel i eskala di kresementu ei. Sinembargo, si e mesun nivel di konosementu akí, i no mas, a ser detektá den un studiante di skol sekundario, esei lo a indiká un frakaso kolosal den su edukashon. E ta similar ku nos kresementu den e grasia i konosementu di Dios. Den kada etapa di nos desaroyo, nos por ta mes perfekto den nos esfera ku Kristu tabata den esun di djE.

E siman akí nos ta studia kon Moises, dor di konosé i sigui e instrukshonnan di Dios, tabata krese den su kaminata ku Señor.

E Tènt di Reunion

Lesa Eksodo 33:7–11. Dikon Dios a pidi Moises traha e tènt di reunion?

Nos no mester konfundí “e tènt di reunion” (trahá pafó di e kampamentu di Israel) ku e tabernakel, ku a ser konstruí mas despues i tabata situá den sentro di e kampamentu. Nos no sa kuantu biaha Moises a konsultá ku Dios den e tènt di reunion. Sinembargo, un kos nos sa sigur: Moises su enkuentronan ku Dios a resultá den un amistat estrecho entre nan. “SEÑOR a papia ku Moises kara kara, manera un hende ta papia ku su amigu” (Eks. 33:11, NKJV). Un amigu ta un persona ku nos por konsultá i diskutí kasi tur kos abiertamente kuné i konfia ku nunka e lo no revelá esaki na otronan. Un amigu ta un di e kosnan di mas bunita pa nos tin i un di e personanan di mas bunita pa ta.

Manera registrá den Eksodo 19–34, e storia di Moises ta masha instruktivo di kon Dios ta transformá nos bida. Kon Dios a konstruí un relashon ku e lider sobresaliente akí? Un estudio di e bida di Moises ta mustra kon el a krese den su konosementu, no solamente di e poder di Dios sino di Su amor i karakter. Esaki ta un komponente krusial di tin un relashon ku Dios. Promé ku el a yega na Seru Sinai, Moises a ser usá poderosamente dor di Dios, asta miéntras e tabata ser prepará pa un ròl di liderazgo spesial. Den e tera di Midian, miéntras e tabata kuida karné, Dios a inspir’é pa skirbi dos buki: Job i Génesis. Despues, den e suseso dramátiko di e mata ku tabata kima, el a ser yamá dor di Dios pa guia Israel saka for di Egipto. El a mira e derota di e diosnan egipsio i e ehérsito egipsio poderoso den Laman Kòrá. El a opservá pa hopi siman kon Dios a guia Israel for di Egipto pa Sinai. Despues ku e eksperensia a resultá den su kara briante, el a guia Israel pa 39 aña mas, te na rant di e Tera Primintí. E mensahe bíbliko ta deklará ku Moises tabata un sirbidó fiel di Dios (Deut. 34:5, Hos. 1:1), un lus intakto den skuridat, un profeta modelo pa medio di ken otronan lo a ser midí (Deut. 18:15,18). E tabata un agente di kambio, aunke e hendenan no semper a sigui su instrukshonnan i palabranan. Ora nan a hasi esei, nan tabata prosperá.

Nos por siña for di Moises pasobra su storia di bida eksepshonal ta konta nos kiko Dios por hasi ora nos lag’E kambia nos. Kua tabata algun punto di kambio den bo kaminata ku Dios, kaminda bo a rekonosé kon El a obra poderosamente den bo bida?

Ku Mi Por KonoséBo

Lesa Eksodo 33:12-17. Kiko Moises a pidi Señor pa siñ’é? Dikon el a demandá Dios su presensia pa guia nan?

Moises su kresementu den Señor tabata konstante. El a hala mas i mas serka di Señor i a buska pa modelá su mes segun e imágen di Dios. Un dia ora e tabata kombersando ku Dios den e tènt di reunion, Moises a realisá diripiente ku e no tabata konos’E, i el a pronunsiá un orashon spesífiko: “ Mustrami awor Bo kaminda, pa mi por konoséBo” (Eks. 33:13, NKJV). Moises tabata konsiente di su nesesidat profundo pa komprondé Dios riba un nivel nobo. El a deskubrí ku mas e tabata konosé Señor, mas e no tabata konos’E. El a rekonosé su nesesidat i di henter su kurason e tabata deseá di konos’E mihó. Boluntariamente Dios a kumpli ku Moises su deseo.

Dor di wak e eksperensianan di Moises te asina leu, nos por opservá kon Moises a ser atraé den un relashon mas íntimo i profundo ku Señor i kon el a krese spiritualmente.

Promé, Moises a subi e seru i “a bai serka Dios” (Eks. 19:3, NKJV). Despues el a bai “te riba kabes di e seru” (Eks. 19:20, NKJV) i despues a aserká e nubia, “e skuridat diki” den kua Dios tabata biba (Eks. 20:21, NKJV).

Na un otro okashon, “Moises a drenta den e nubia” kaminda Dios tabata, i el a keda serka Señor 40 dia i 40 anochi (Eks. 24:18, NIV). Durante e 40 dianan akí, Dios a duna Moises dos regalo presioso:

1. e regalo di e Dekálogo skirbí dor di Dios Mes riba e dos tablanan, tambe kobá ku beitel dor di djE (Eks. 24:12), i
2. e instrukshonnan riba kon konstruí i muebla e tabernakel (lesa Eksodo 25–31).

Despues el a pasa 40 dia i anochi mas ku Señor, intersediendo pa pekadornan (Eks. 32:30–32, Deut. 9:18).

Sinembargo, asta despues di tur esaki, Moises tabata deseá di konosé e karakter di Dios mas konkretamente, i pronto Dios a dun’é noshonnan spesial pa komprondé ken E ta. E konosementu akí ku Moises tabata deseá no tabata un simpel komprondementu intelektual di Dios sino un konosementu eksperensial di Su persona.

No ta straño ku siglonan despues Hesus lo a bisa: “I esaki ta bida eterno, ku nan por konoséBo, e úniko Dios berdadero, i Hesu-Kristu kende Bo a manda” (Juan 17:3, NKJV). Ki mihó manera pa Dios hasi Su mes konosí na hende ku dor di bira un hende E mes?

“Por fabor, Mustrami Bo Gloria”

Despues di e apostasia di e bisé di oro, Moises a intersedé pa e pueblo di Dios i ker a haña siguransa ku Señor lo a sigui hiba nan na e Tera Primintí. Profundo den su ser, e tambe ker a konosé Señor mihó.

Lesa Eksodo 33:18–23. Kon Dios a kontestá Moises su petishon pa mira Su gloria?

“Por fabor, mustrami Bo gloria,” Moises a pidi Señor. Den Su mizerikòrdia, Señor a revelá Su gloria na dje. Sinembargo, ora Dios a kontestá e petishon di Moises, El a primintí di mustr’é Su “bondat.” Un hende por konkluí ku siguridat ku e gloria di Dios ta Su bondat, esta, Su karakter (lesa tambe Ellen G. White, The Acts of the Apostles, p. 576; Christ’s Object Lessons, p. 414, 415; Prophets and Kings, p. 313).

“Ta e gloria di Dios pa duna Su birtut na Su yunan. E ta deseá di mira hòmber- i muhénan alkansá e norma di mas haltu.”—Ellen G. White, The Acts of the Apostles, p. 530. Su gloria ta pa brasa pekadornan arepentí (lesa Prophets and Kings, p. 668) i suministrá tur loke ta nesesario pa kambia nan. Na mes momentu, ta nos “gloria” pa revelá Su karakter den nos propio bida i pa hasié konosí na otronan.

E refleho akí di e karakter di Dios, Su bondat, amabilidat, i amor tierno, mester ser mirá den nos akshonnan. Di e manera akí, nos tin un chèns di ta no solamente un bendishon pa mundu sino un lus ku ta bria pa e universo ku ta wak. Manera Pablo ta deklará: “Pasobra ta parsemi ku Dios a pone nos apòstelnan den eksposishon na final di e proseshon, manera esnan kondená na muri den arena. Nos a ser hasí un espektákulo pa henter universo, pa angelnan i tambe pa sernan humano” (1 Kor. 4:9, NIV). E dimenshon kósmiko akí ta duna nos bida i sirbishi un nifikashon i propósito ku apénas nos por kuminsá imaginá.

Den Romanonan 2:4, Pablo ta bisa ku “e bondat di Dios ta hibabo na arepentimentu” (NKJV). Es desir, ta e bondat i karakter di Dios señalá pa Spiritu Santu ku ta konvensé hende di nan pekaminosidat i nesesidat di salbashon. En bèrdat, ora nos wak e krus i sa ken tabata einan (Señor Mes) i dikon E tabata einan, pasobra E tabata stima nos i esaki tabata e úniko manera pa salba nos, nos tin e revelashon di mas grandi posibel di Su bondat i karakter.

E Revelashon Propio di Dios

Lesa Eksodo 34:1-28. Kon Dios a revelá Su gloria na Moises?

Moises mester a hiba dos tabla di piedra meskos ku esnan promé, ku el a kibra (Eks. 32:19). E tabata bai topa ku Señor riba Seru Sinai pa di shete biaha. Su subidanan anterior ta ser menshoná den e siguiente tekstonan:

1. Eks. 19:3,7;
2. Eks. 19:8,14;
3. Eks. 19:20,25;
4. Eks. 20:21, Eks. 24:3;
5. Eks. 24:9,12–18; Eks. 32:15;
6. Eks. 32:30,31. Moises a kuminsá su subida trempan den mainta.

Moises awor tabata prepará pa e bista glorioso akí den e karakter di Dios. E bunitesa di e karakter di Dios ta ser spliká mihó den e revelashon propio impreshonante akí di Su mes. E ta e deskripshon di mas importante di ken Dios ta; e ta e hilu di oro tehé den henter Beibel (Num. 14:18, Neh. 9:17, Salmo 103:8, Joel 2:13, Jonas 4:2). E proklamashon di Señor aki ta e Juan 3:16 di Tèstamènt Bieu. Den lugánan krusial, outornan bíbliko ta apliká, ripití, òf ekspandé riba e outoproklamashon akí di e Dios bibu pasobra e karakter di Dios mester ser komprondé korektamente.

Ora Moises a risibí e splikashon eksepshonal, sin presedente i sin igual di e nòmber di Dios, el a bùig i a adorá Señor. Ora nos haña noshonnan di e amor, grasia, mizerikòrdia, kompashon, bondat, fieldat, pordon, santidat, i hustisia di Dios, nos tambe ta ser atraé na djE. Ta ora nos mira i atmirá Su kualidatnan eksepshonal nos ta kuminsá stim’E, un amor ku ta hiba na e deseo pa sirbiE i obedes’E. Pasobra E ta stima nos, nos ta stim’E bèk (1 Juan 4:19). Den e revelashon propio akí, Dios ta sigurá Moises ku E lo hasi obranan maravioso pa Su pueblo i hiba nan den e Tera Primintí. E ta renobá e pakto ku nan, primintiendo ku otro nashonnan lo mira Su mahestat i obra impreshonante. “Mira, Mi ta sera un aliansa: Dilanti di henter bo pueblo lo Mi hasi maravianan manera nunka a ser hasí den henter tera, ni den ningun nashon; i henter e pueblo meimei di ken bo ta lo mira e obra di SEÑOR. Pasobra ta un kos maravioso ku lo Mi hasi ku bo ” (Eks. 34:10, NKJV).

Sinembargo, e israelitanan mester a obedesé Dios i sigui dies stipulashon kla pa asina nan por a sigurá nan prosperidat. Despues Moises a ser pidí dor di Dios pa skirbi e kontenido di e pakto ei, ku ya a ser kibrá (Eks. 34:27,28).

E Kara Briante di Moises

Lesa Eksodo 34:29-35. Kiko tabata e kousa di Moises su kara radiante?

Despues ku Dios a revelá Su karakter di amor na Moises, Moises a baha bai na e kampamentu di Israel ku un kara radiante. Moises tabata sa na promé instante ku su kara tabata radia? Di ningun manera. Mas serka un hende ta di Señor, mas profundamente konsiente e persona ta di su imperfekshonnan kompará ku e santidat di Dios.

Kiko tabata e kousa pa Moises su transformashon ku a resultá ku su kara a bira radiante? E motibu no tabata den e simpel echo ku e tabata den presensia di Dios, pasobra vários biaha anteriormente e tabata huntu ku Señor i su kara no a bira radiante despues di e enkuentronan ei. Sinembargo, si nunka e tabata den presensia di Señor, su kara nunka lo a bria. Tabata solamente ora el a komprondé e bondat i amabilidat di Dios, i el a habri su mes kompletamente na Dios pa motibu di e beyesa di Su karakter, ku Moises a ser transformá, i su kara a bria. Nos kurason i mente por eksperensiá un kambio ora nos someté na Dios i pèrmitiE di ta e Señor i Rei di nos bida.

Lesa 2 Korintionan 3:18. Kon Hesus por transformábo gradualmente den Su imágen?

Pablo ta kompará Moises su kara briante ku Hesu-Kristu i ku e gloria di Hesus (den ken Dios su lei i grasia tabata personifiká) ta surpasá e gloria di lei ku Moises. Kristu, huntu ku Su lei, por ser grabá den nos karakternan solamente ora nos fiha nos bista riba Hesus (Hebr. 3:1, Hebr. 12:2) i solamente pa medio di e poder di e Spiritu di Dios (2 Kor. 3:12–18).

Moises ta un modelo pa nos, demostrando kiko Dios por hasi pa nos ora nos pèrmitiE kambia nos karakternan i pa moldia nos den Su imágen divino. Esaki ta loke Pablo ke men ora e ta papia di kana den e “nobedat di bida” (Rom. 6:4).

Lesa Ellen G. White, “Idolatry at Sinai,” p. 327–330, den Patriarchs and Prophets kuidadosamente.

Riba un dia sombrio, un tata i yu a bishitá un katedral. Segun ku nan tabata wak e bentananan di glas dekorativo ku representashon bunita di diferente senario bíbliko, diripiente solo a kuminsá bria dor di e kuadro di glas di hende, iluminando nan briantemente ku lus impreshonante. E mucha hòmber chikitu a puntra su tata: “Papi, ken e hendenan akí ta?” E tata no tabata sa muchu tokante kristianismo, Kristu, òf Su disipelnan pero rápidamente el a kontestá: “E hendenan akí ta kristiannan.” E kuadro deslumbrante akí a keda den mente di e yu hòmber. Un dia e maestro di e mucha hòmber a puntra den klas: “Muchanan, boso sa ken kristiannan ta?” E mucha chikitu a kòrda riba e kuadro briante den e katedral i a kontestá: “Mi sa; kristiannan ta hendenan briante.” Den e mesun liña, Hesus a bisa Su siguidónan: “Laga boso lus bria dilanti di hende, pa nan por mira boso bon obranan i glorifiká boso Tata den shelu” (Mat. 5:16, NKJV). Solamente hendenan briante por ta agentenan di kambio.

Preguntanan pa Diskushon: