Awendia nos ta tende di hopi malesa straño ku ta azotá nos mundu. Dòkternan i sientífikonan ta hasi tur nan posibel pa haña remedi i otro medionan pa kura e malesanan akí. Hende ta kana tur sorto di kaminda pa haña kura pa nan malesa. Den tur esaki, tin hende ta bisa ku ta serka HESUS bo mester bai pa haña solushon pa tur bo problema. Abo ta kere esaki?
Ora nos lesa den nos Beibel, nos ta mira ku Juan 5:2-9 ta konta nos ku "na Yerusalèm, na e porta di karné, tin un tanki di awa ku na hebreo yama Betèsda, i ku tin sinku veranda di pilá. Den nan tabatin drumí un multitut di hende malu, siegu, lam, paralisá, ku tabata spera riba moveshon di e awa."
Na sierto temporada e awa den e tanki tabata drenta den moveshon. Por lo general hende tabata kere ku esaki tabata konsekuensia di un forsa sobrenatural.
Nan tabata kere ku esun ku ta promé pa drenta den e awa despues di e moveshon, lo a kura di kalke malesa ku e tabatin.
Hopi, spesialmente esnan mas suak, no por a yega mas leu ku e rant dje tanki. Algun ku a yega dje leu ei, tabata muri na e rant. Hesus tabata na Yerusalèm atrobe. E tabata kana su so, pensando, meditando i hasiendo orashon.
El a yega na e tanki. Einan Su bista a kai riba un hòmber ku tabata malu pa 38 aña kaba.
Solitario i sin niun amigu, e tabatin hopi aña miserabel tras di lomba, miéntras e tabata pensa ku ya e no por a konta ku Dios Su misèrikòrdia mas.
Hopi bia el a purba yega na e awa. Su esfuersonan i tur e bianan ku el a keda desapuntá, poko poko tabata kaba ku su forsa.
E hòmber malu tabata drumi riba su kama i de bes en kuando e tabata hisa su kabes p'e wak e awa.
I na un dje momentunan ei un kara tièrno, yen di kompashon a sak over di dje i e palabranan "Bo ke bira bon?" a hala su atenshon.
Speransa a lanta den su kurason. El a sinti ku di un òf otro manera e lo a haña yudansa. Pero e speransa a disparsé atrobe. El a kòrda kuantu bia el a purba yega na e tanki i e tabatin miedu ku e lo no biba sufisiente largu pa e mira e awa move atrobe.
Desesperá el a bira i kontestá: "Señor, mi no tin niun hende pa pone mi den e tanki ora e awa ser mové; i miéntras mi ta na kaminda, un otro ta baha aden promé ku mi." (v.7)
Hesus no ta puntra si e hòmber malu ke kere den djE. Simpelmente E ta bisa: "Lanta, kue bo kama i kana." (v. 8)
E hòmber ta kere e palabranan ei.
E ta sinti ku kada múskulo i kada nèrvio den su kurpa ta haña bida nobo i su mannan i pianan ta haña
forsa.
Sin puntra nada, i ku forsa di boluntat pa obedesé Hesus su mandato, su múskulonan ta obedesé su boluntat. E ta bula lanta i bira aktivo.
Hesus no a primintí yudansa divino. E hòmber por a duda i pèrdè su último chèns di bira bon. Pero el a kere e palabranan di Hesus; i komo ku el a aktua según esei, el a haña forsa.
Nos tambe, dor dje mesun fe akí, por haña kura spiritual. Piká a separá nos for di Dios. Nos spiritu ta lam. Di nos mes forsa nos no por biba un bida santu, meskos ku e hòmber lam no por a kana di su mes.
Hopi hende lo realisá nan inkapasidat i ta anhelá e bida spiritual ku lo trese nan den harmonia ku Dios. Nan ta hasi esfuerso pa hañ'é, pero enbano. Den desesperashon nan ta grita: "Hende miserabel ku mi ta! Ken lo libra mi di e kurpa di morto aki?" (Romanonan 7:24)
E hendenan desesperá i luchando akí, mester wak na laira. Señor ta sak over di esnan ku E kumpra ku Su sanger i ta bisa ku inmenso ternura i kompashon: "BO KE BIRA BON?"
E ta komandá bo pa lanta, salú i ku forsa. No warda te ora bo sinti ku bo a bira bon. Kere den Su palabra i E lo kumpli. Pone bo boluntat tras di e boluntat di Kristu. Si bo sirbiE i bo aktua según Su palabra, lo bo haña forsa. No importá kua mal kustumber bo por tin, ni kua pashon karnal por tin bo mará: Kristu por i E ke libra bo for di esei. E ke trese bida na e hende ku ta morto dor di kibramentu di lei. E ke libra e prezu ku, dor di debilidat i kontratiempo, ta mará ku kadenanan di piká.
Awe Hesus ta puntra bo:
Djis kere den Su palabra, aktua según esei, i lo bo risibí e liberashon ku bo tin mester !