“Papi, pakiko mi mester stima Hesus?” un mucha a puntra su tata un dia. E tata a wak su yu i a puntr’é: “Bo stima papi?” “Sigur ku sí,” tabata e yu su kontesta. “Pero, bo a yega di pensa dikon bo stima papi?” E mucha su wowonan a bai di un banda pa otro, i ku un sonrisa riba su kara el a kontestá: “Mi stima papi, pasobra papi stima mi.”
Amor ta kousa amor. Nada no ta resistí e magnetismo di amor; i un dje gran bèrdatnan bíbliko ta ku Kristu a stima nos di tal manera ku lo mínimo ku nos por hasi ta di stim’É tambe.
Pero dikon tin hende no ta yega na stima Dios?
Konstantemente nos ta bisa ku El a muri na krus pa salba nos, pero hopi bia nos no ta komprondé kompletamente kiko esei ta nifiká.
“Kon mi por tin e kurashi di keda sin stima un hende ku ta stima mi asina tantu?”
E dia ku nos komprondé loke realmente a sosodé e atardi ei riba e krus di Kalvario, nos lo bolbe hasi nos mes e pregunta ei.
Ora Dios a krea e ser humano, El a dun’é un òrdu: “Di tur palu dje hòfi bo mag kome libremente; ma di e palu di konosementu di bon i malu lo bo no kome, pasobra e dia ku bo kome di dje, lo bo muri sigur”. (Génesis 2:16,17).
E òrdu ei tabata kontené un prinsipio: obedensia meresé bida, i desobedensia meresé morto. Hende a peka, i komo konsekuensia, nos mester tabata morto. Nos mester a muri.
“Pago di piká ta morto” (Romanonan 6:23), pero ta sosodé ku hende no ke muri. E ta sklama, pidi pordon. “Tata, pordoná mi”. Loke nos ta bisa e ora ei realmente ta: “Tata, mi a peka, mi meresé morto pero, por fabor, mi no ke muri”.
Hende no ke muri; den e kaso ei, un otro tin ku muri. Un hende tin ku paga e preis di piká na lugá dje ser humano. I einan a paresé e figura mahestuoso di e Yu.
Ta p’esei Hesus a bin riba e mundu akí komo un mucha.
E no tabata parse humano so, E tabata humano di bèrdat. Meskos ku abo i ami. E tabatin e mesun luchanan ku abo tin, i tin ora E tabata sintiÉ solitario i ku hende no tabata komprond’É, meskos ku bo. El a eksperensiá bo tentashonnan, i ta p’esei, i no simplemente pasobra E ta Dios, E ta mas dispuesto pa stima bo i komprondé bo, ku husga bo i kondená bo.
Señor Hesus a biba 33 aña riba e mundu aki. Beibel ta bisa ku El “a wòrdu tentá den tur kos meskos ku nos, ma tòg sin piká”. (Hebreonan 4:15).
Awor, si El a biba riba e mundu akí komo hende, i komo hende El a ser tentá i no a peka, pa e prinsipio di kastigu E meresé bida.
Komo ser humano, El a gana e derecho di bida. Kontrali na esei, hende a peka i meresé morto. Pero El a pidi Su Tata pa E muri e morto ku hende meresé; i e bida ku E meresé, El a ofresé na hende.
Ta esei a sosodé riba e krus di Kalvario. Un interkambio di amor. Un hende a muri na nos lugá. Un hende a muri pa salba nos.
E atardi tristu ei, ora Hesus a subi e seru di Kalvario kargando un krus pisá, Hesus tabata kargando un krus ku no tabata di djE. Nunka un krus no a ser trahá p’É, simplemente pasobra E no tabata meresé un krus. E atardi ei Kristu tabata kargando mi krus. Ta ami tabata meresé morto, pero El a stima mi asina tantu ku El a disidí di muri na mi lugá i ofresé mi e derecho di bida, e derecho ku E, komo hende, a konkistá.
Bo a yega di para ketu i pensa riba e akto di amor ei? Tabata Dios hasí hende, i komo hende E tabatin miedu di muri. Pero E tabata sa ku e bida di henter humanidat tabata den Su man. Su amor tabata mas grandi ku Su miedu; mas grandi ku bida.
Dikon Hesus a stima nos asina tantu?
Bo bida ta e kos mas importante ku Kristu tin. E ta stima bo di tal manera ku, teniendo oportunidat pa hala’tras, El a aseptá pa muri pa abo ta felis.
Kisas nunka lo mi no yega na komprondé e plenitut di Kristu Su amor pa mi.
Pero ora mi hisa mi bista na e seru solitario, i mi mira un Dios di amor kologá na e krus, e pregunta ta surgi: “Kon mi por tin e kurashi di keda sin stima un hende ku ta stima mi asina tantu?”