Awendia tin hopi hende ku tin gana di yega serka Hesus, pero nan no sa bon kon pa hasi esei. Of nan ta haña sa, pero nan ta topa ku estorbonan den kaminda.
Beibel ta konta nos di e kaso di Bartimeo den e buki di Marko 10:46-52. Manera semper, e dia akí tambe tabatin un multitut siguiendo Hesus. Huntu ku Su disipelnan, nan tabata saliendo fo'i Yériko. Na porta di e stat tabatin un pididó di limosna siegu sintá kantu di kaminda. Ora el a tende ku ta Hesus tabata pasando, el a kuminsá grita: "Hesus, Yu di David, tene misèrikòrdia di mi!" (v. 46,47)
Den nos anhelo pa Hesus skucha nos i yuda nos den nos mester, nos ta resa i sklama na djE pa yudansa.
Hopi hende tabata ròus e i mand'é keda ketu; ma el a grita mas duru: "Yu di David, tene misèrikòrdia di mi!" (v. 48)
Hopi bia ora hende tende ku bo ke buska pa konosé Hesus, ku bo ke drenta den kontakto ku e Ser Supremo, nan ta bira kontra bo. Nan ta manda bo stòp di hasi ko'i loko. Pero meskos ku Bartimeo a perseverá i sigui yama Hesus, asta mas duru ainda, nos tambe mester perseverá den nos intento, maske kuantu kos hende bisa nos. Pasobra e ora ei Hesus ta para ketu i bisa nos: "Bin akinan".
E Palabra di Dios ta bisa nos ku ora Hesus a bisa Bartimeo: "bin", "el a benta su mantel un banda,
bula'riba i a bin
serka Hesus". (v. 50)
Aki nos ta mira obedensia inmediato i esfuerso. Bartimeo no a pensa dos biaha. Mesora el a benta loke tabata strob'é un banda. E no kier a pèrdè tempu. El a bula'riba i purá el a bai serka Hesus, pasobra e tabata sa ku ta Hesus so por a yud'é. Asina nos tambe, ora Hesus bisa nos "bin", nos no mester wak atras, sino obedesé i bai mesora serka djE, konfiando ku E lo yuda nos den nos mester.
I ora Bartimeo a yega serka Hesus, El a puntr'é: "Kiko bo ke pa Mi hasi pa bo?" I Bartimeo a bis'E: "Maestro, mi ke rekobrá mi bista!" (v. 51)
Hesus konosé nos kada un personalmente. E sa kiko nos kada un tin mester. Pero E ke pa nos rekonos'É komo Esun ku por yuda nos. E ke pa nos bin serka djE i bis'É ku nos mes boka kiko nos ke pa E hasi pa nos.
I Hesus a bis'é: "Bai, bo fe a salba bo". I mesora el a rekobrá su bista i a sigui Hesus riba kaminda. (v. 52)
Asina simpel. “Bo fe a salba bo”. Ta e fe ku Bartimeo tabatin, a pon'é rekobrá su bista. Ta e fe ku nos ta demostrá den Hesus, ta pone nos haña solushon pa nos problemanan. Ta e fe ku nos tin den Hesus, ta pone nos prekupashonnan bai.
Ora nos pèrseverá den nos intentonan pa buska i yega serka Hesus, E ta kla pa risibí nos. Úniko kos ku nos mester hasi ta: aseptá Su invitashon: "Bin", obedesé loke E bisa nos i tin fe den Hesus.
Awe Hesus ta hasi abo e mesun pregunta ku El a hasi Bartimeo algun mil aña pasá:
Djis bin serka djE i bis'É kiko bo ke p'E hasi pa bo.
Mantené bo fe den Hesus i E lo sòru pa bo.