Señor ta mi wardadó, lo mi no tin falta di nada. E ta pone mi drumi den lugá di yerba bèrdè; E ta hiba mi kantu di awanan ketu. E ta restorá mi alma; E ta guia mi den e kamindanan di hustisia pa motibu di Su nòmber.

Maske mi kana den e vaye di sombra di morto, lo mi no tin miedu di maldat, pasobra Abo ta ku mi; Bo bara i Bo garoti ta konsolá mi. Bo ta prepará un mesa mi dilanti den presensia di mi enemigunan; Bo ta ungi mi kabes ku zeta; mi kopa ta yen te basha ofer. Siguramente bondat i misèrikòrdia lo sigui mi tur e dianan di mi bida, i lo mi biba den e kas di Señor pa semper.

“Ami ta e bon wardadó. E bon wardadó ta duna Su bida pa Su karnénan”. (Juan 10:11)

“Ami ta e bon wardadó; Mi konosé esnan ku ta di Mi, i esnan ku ta di Mi konosé Mi”. (Juan 10:14)

E karné ta un dje bestianan di mas tímido i ku mester di mas kuido den e mundu di bestia. Según ku e wardadó ta guia su karnénan dor di e serunan i mondinan peligroso pa hiba nan na un lugá sigur ku nan por kome i bebe, e ta protehá nan kontra ladronnan, e ta kuida pa esnan mas débil òf ku ta malu, su bida ta bira ún ku esun di nan.

Meskos ku e wardadó terenal konosé kada un di su karnénan, e Wardadó divino konosé Su tou ku ta plamá riba henter mundu. Hesus konosé nos personalmente, na nos nòmber. Meskos ku e wardadó ta bai dilanti di su karnénan i enfrentá e peligernan promé su mes, asina Hesus ta trata ku Su tou. Pesei, laga nos hasi e Salmo 23 nos meditashon di kada dia.