"I nan a yega Bètsaida. I nan a trese un hòmber siegu serka djE, i a rogu'E pa E pone man riba djé. I El a kohe e siegu na su man i a hib’é pafó di e pueblito; i despues di a skupi riba su wowonan i di a pone Su mannan riba dje, El a puntr’é: 'Bo ta mira Algu?' I e hòmber a hisa kara wak i a bisa: 'Mi ta mira hende, pasobra mi ta mira nan manera palu ta kana rònt.' Djei El a bolbe pone Su mannan riba wowo di e hòmber; i el a mira bon i a keda restorá, i tabata mira tur kos kla kla. I El a mand'é su kas, bisando: 'No bai mes den e pueblito. (Marko 8:22-26)
Hesukristu a kura hopi hende siegu durante Su ministerio terenal, i kuater di nan ta ser registrá
den detaye den e Evangelionan. Marko so ta registrá Hesus Su milager di kurashon di e hòmber siegu
di Bètsaida. E milager akí no a sosodé muchu leu for di e esena di e alimentashon di e sinku mil.
(vs 1-9)
Algun amigu òf famia a trese e hòmber siegu serka Hesus pa haña kura. Algun komentarista ta bisa ku promé ku E trata ku e hòmber den su estado siegu, Hesus a separá e hòmber aflihí for di e multitut. Meskos ku otro kurashon, Hesus a uza Su skupi riba wowonan di e hòmber.
Nos tin ku komprondé e kurashon akí den konteksto di e eventonan rondó di dje.
Markos 2:19-22 i 3:5-7 ta pone e base pa e milager akí den dos fase. E disipelnan no tabata komprondé ku Kristu mester a muri (2:20) siendo ku e fariseonan tabata traha plan pa mat'E (3:6)
E disipelnan mester a haña un lès. Ta solamente dor di sigui kontemplá Hesus, despues di su morto i resurekshon, nan por a komprondé ku su morto tabata na fabor di humanidat.
E milager akí ta ilustrá bèrdatnan spiritual importante. Aunke e hòmber tabata por sinti lus kaba, el a keda práktikamente siegu. Su sieguedat ta un deskripshon físiko di sieguedat spiritual òf moral, ku ta indiká un hende ku ta inkapas pa diserní e bèrdatnan spiritual i moral ku ta evidente pa esnan ku Dios a yama.
E kuramentu di e hòmber siegu ta úniko pasobra e ta sosodé den fase mas bien ku instantáneamente. E hòmber ku a nase siegu mester a bai na e tanki di Siloam i laba su wowonan (Juan 9), pero unabes el a hasi esaki, e kurashon tabata inmediato (Juan 9:7). Algun malesa no por ser kurá gradualmente, kua ta rekerí un suplá desisivo pa kaba ku nan. E sakamentu di un demoño, por ehèmpel, mester ser kumplí kompletamente sino e no ta ser saká ètòl (Marko 1:21-28; 5:1-20; 7:24-30; 9:14-29). Un leproso ta ketu bai un leproso si e manchanan keda (Marko 1:40-45; Lukas 17:11-19). Sinembargo, sieguedat por ser kurá den fase: promé un chispa di lus, despues mas klaridat, i finalmente vishon perfekto.
E kuramentu den fase akí ta duna un bista di e proseso di bira madurá di e komprondementu spiritual di un kreyente, e proseso di kombershon ku kada Kristian ta eksperensiá. Kristu ta puntra e hòmber siegu “si el a mira kualke kos” (Marko 8:23). Despues di a wak ariba, den kara di e Fuente di lus i wak rònt di dje el a kontestá, “Mi ta mira hòmbernan manera palu, kanando” (v. 24). Esaki ta un indikashon ku e no a nase siegu. Sinembargo, e no por a diserní korektamente e forma i magnitut di e ophetonan ku el a rekonosé.
E método di kurashon akí di Kristu ta mustra ku nos iluminashon spiritual ta un proseso kontinuo. Na prinsipio, nos no por mira e bèrdat di Dios klaramente. Mayoria di nos sieguedat spiritual ta keda, ma segun ku nos fe, obediensia, i kresementu ta desaroyá, Hesus, “e outor i konsumidó di nos fe” (Hebreonan 12:2), ta oumentá e klaridat di nos vishon spiritual a traves di e poder di Su Spiritu Santu.
Hesus ta bolbe mishi ku wowonan di e hòmber, i e biaha akí su bista ta bira kompletamente kla. Ora
siruhanonan di wowo ta restourá vishon pa medio di sirugia awendia, nan ta permití nan pashèntnan
solamente un krenchi di lus na prinsipio pa asina e nèrvio óptiko por kustumá kuné pokopoko promé ku
e ser eksponé na e lus pleno di dia.
E echo signifikante di ponementu di man di Hesus ta mustra ku Su disipelnan, aunke pa gran parti ainda ta siegu (Marko 8:16-18), a kuminsá mira. E lo a toka nan atrobe despues di Su resurekshon (Lukas 24:44-49), i habri nan wowonan kompletamente na Su bèrdat. E bista restourá kompletamente ta proba ku Hesus nunka ta laga Su trabou sin terminá i ku E ta ehekutá ku ekselensia, e aktitut eksepshonal ku mester ta presente den tur nos akshonnan i servisio (Eklesiastés 9:10).
E akto di sanashon ta ser mirá den e deklarashon simpel pero fuerte: “El a ser restourá”. E lenguahe ta verifiká ku e hòmber no a nase siegu. E promé ehersisio di su bista restourá tabata probablemente di wak den Hesus Su kara. Por lo tantu, spiritualmente, Kristu mester ta nos promé enfoke ora Dios duna komprondementu.
E ta bisa: “No bai ni den e stat,” Aparentemente e hòmber akí no tabata di e stat ei, sino a bin ta sigui Hesus un tempu kaba. Esaki no tabata un prohibishon universal sino tabata limitá na Bètsaida. Dikon? Kristu a hasi hopi obra poderoso aya, ma e habitantenan di e stat a rechasá nan den inkredulidat. Komo resultado, El a pronunsiá un aflikshon riba nan (Mateo 11:21). Den e mandato di Hesus na e hòmber kurá, Bètsaida a risibí un huisio suave pero signifikante pa no a respondé riba Su obranan.
Rechaso di bendishon spiritual ta kousa pèrdida di privilegio spiritual. Si nos no ke Dios den nos bida, E lo laga nos sigui nos boluntat liber, i E lo bai.
Nos tur mester kontemplá e huisio akí riba Bètsaida i riba tur esnan ku faya di honra nan privilegionan spiritual. Nunka ta lat pa bira bèk na Dios den repentimentu.
Mara, na e momentu akí, bo por disidí di kontemplá Hesus i su bondat pa bo, i disidí di entregá bo
mes kompletamente den su man i lag’É guia bo bida di awor en adelante.